|
ده‌شێ نوسه‌رو رۆژنامه‌نووسی مراوغه‌كار سیاسییه‌كی
درۆزن بێت ، ده‌شێ سیخورێك بێت له به‌رگی سواڵكه‌ردا
یان له پۆشاكی خێرخوازێك كه هه‌ر جاره‌و به ره‌نگێك
خۆی نمایش بكات ، ده‌شێ فالچییه‌ك به سیمای نورانی
بێت ،ده‌شێ خۆی به به سه‌ربه‌خۆو ئازاد له بیر
كردنه‌وه‌و تێرامان بشوبهێنیت ،به‌ڵام له كرۆكدا
كۆیله‌یه‌كی ملكه‌چپێكراوی حزب بێت !
حزب له كوردستاندا بووته دیوه‌خانی كۆنه‌جاش و
شۆڕشگێڕه فایلداره‌كان ، ئه‌مه نه‌ك ئاسایی و سروشتی
نییه، به‌ڵكو مه‌ترسیداره بۆ سه‌رهوشیاری خه‌ڵك ، ده‌ركه‌وتنی
ڕووی ڕاسته‌قینه‌ی ئه‌م گه‌مه‌كارانه‌و هه‌ڵدانه‌وه‌ی
ده‌مامكه‌كانیان ڕنگه له كوردستاندا زه‌حمه‌ت و ئه‌سته‌م
نه‌بێت ، به‌ڵام ئه‌وه‌ی كه مه‌ترسیداره شێواندنی
هوشیاری كۆمه‌ڵگاو ناشیرینكردنی په‌یامی نوسیینه ،
ئاخر ئه‌و نوسه‌ره گه‌مه‌كارو گاڵته‌جاره زیره‌كانه
كار له‌سه‌ر هه‌ست و نه‌ست و سۆزی هاونیشتیمانیان ده‌كات
.
فاكته‌ری سه‌ره‌كی بۆ دروستبوونی ئه‌م جۆره نوسه‌ره
گه‌مه‌كاره كه ناوی ده‌نێم (گاڵته‌جار ) خودی حزبه
، چونكه حزب زه‌مینه‌سازی و كارگه‌ی به‌رهه‌مهێنانی
ئه‌م جۆره له نوسه‌ری گاڵته‌جاره، ناسینه‌وه‌ی ئه‌و
جۆره نوسه‌ره گه‌مه‌كارو گاڵته‌جاره‌ی كه ئێستا
بووه‌ته سۆپه‌ر ڕیفۆرمخوازو سۆپه‌ر دیموكراتخواز، ئه‌گه‌ر
به چاوێكی دیقه‌ت و ووریاییه‌وه له خۆیان باكگراوه‌ندو
نوسین و ژێرخانه فكرییه‌كانیان وورد بیته‌وه ، باش
تێده‌گه‌یت كه له پشتی نوسینه‌كانیان لۆژیكێكی
كوشنده‌و ده‌رونێكی نه‌خۆش هه‌یه ، به چاوپۆشین له
ناشاره‌زایی و هه‌ژاری و ده‌ستكورتی و موفلیسی
مه‌عریفی كه له پاشخانی فكری و سیاسییان هه‌یانه،
هاوكات له‌گه‌ڵ كاڵفامیان له ته‌وزیف و ته‌ئویلكردنی
چه‌مك و كرۆكی نوسین له ڕووی چۆنایه‌تیه‌وه .
هه‌میشه ئه‌مجۆره نوسه‌ره گاڵته‌جارانه له بری
ئینتیما بۆ به‌هاو قییه‌می ئینسانبوون ، حه‌زیان به
كۆیلایه‌تی و ملكه‌چبوون هه‌یه ، هه‌میشه له بری
ئینتیما بۆ نه‌ته‌وه‌ونیشتیمان ، له‌خه‌می كلتوری خێڵ
و هۆزو بنه‌ماڵه‌یه‌كدان ، له‌كاتێكدا پێویسته
چهمكه‌كانی خێڵ و عه‌شیره‌ت و هۆزو بنه‌ماڵه‌ومێگه‌ل و
ره‌عیه‌ت تێپه‌ڕێنین .
ئه‌م جۆره نوسه‌رانه به‌یت و بالۆره بۆ ئاگری شه‌ڕی
براكوژی خۆشده‌كه‌ن ، ده‌بێته پارێزه‌ری خۆی و حاكمی
حزب ، وه‌لێ كه ئاگری شه‌ڕه‌كه كڵپه‌ی بڵێسه‌ی كرد ،
له بێده‌نگییه‌كی شه‌رمنانه‌دا بێ هیچ
روونكردنه‌وه‌یه‌ك له نێو تارمایدا و له پڕێكا بۆ
جوگرافیایه‌كی تر هه‌ڵدێت ، ئیدی نه لێدوان و نه‌پاساوی
نییه .
شوانە حەسەن ئەبوبەکر
21/4/2017
|
