لە درێژەی ناڕەزاییەتییەکانی لایەن و توێژەکانی کۆمەڵانی خەڵکی کوردستان لەناوەوە و دەرەوەی وڵات دژ بە تیرۆرکردنی ڕۆژنامەوانی لاو ویداد حوسێن لە شاری دهۆک، لە ڕۆژی شەممە ٢٧ ئابی ٢٠١٦ لە شاری میلبۆرنی ئوسترالیا گردبوونەوەیەک سازکرا بە مەبەستی شەرمەزارکردنی ئەو جۆرە تاوانانە و دژ بە پێشێلکردنی مافی ڕادەربڕین.

لە گردنوونەوەکەدا کە بە ئامادەبوونی چەند ئەندامێکی ڕەوەندی کوردی لە چالاکوانان و میدیاکاران بەڕیوەچوو، ئامادەبووان لە چوارچێوەی گفتوگۆیەکی کراوەدا جەختییان کردەوە لەسەر پێویستی شکاندنی بێدەنگی و بەرفراوانکردنی دەربڕینی ناڕەزاییەتییەکان دژ بە ئەنجامدانی ئەو تاوانە و داواکاربوون لە لایەنە سیاسییەکان بە تایبەت ئەو لایەنانەی خۆیان لەبەرەی ئۆپۆزسیون ئەبیننەوە، هەڵوێست وەرگرن و چیتر تەنیا بە بەیاننامە و ڕاگەیاندن نەوستەنەوە، بەڵکو بە شێوەیەکی پراکتیک دژی دەسەڵاتی حکومەتی هەرێم کە لەلایەن پارتی دیموکراتی کوردستانەوە تاکڕەوانە لە زوونی زەرد بەڕێوە ئەچێت بوەستنەوە، بۆ کۆتایهێنان بە کاری توندوتیژی و تیرۆرکردنی ڕۆژنامەوانان. هەروەها جەختییان کردەوە لە پێویستی بەردەوامی بەدواداچوون لەسەر کەیسی سۆرانی مامە حەمە، سەردەشت عوسمان و کاوە گەرمیانی. ئەگەر نا خەڵکی کوردستان بە بەرپرسیار و کەمتەرخەمیان ئەزانێت. چونکە بێدەنگی لە تاوان، تاوانە.

هەر لەو بۆنەیەدا، ئامادەبووان پێداگربوون لە پێویستی و گرنگیدان بە ڕیکخستنی هەوڵەکان و بەستنی کۆڕو کۆبوونەوەی بەردەوام بۆ باسکردن و بیروڕاگۆڕینەوە لەسەر پرس و دۆزە چارەنوسسازەکانی چەماوەری خەڵکی کوردستان ودژ بە پێشیلکردنی مافەکانیان و خەمسادری و بێباکی دەسەڵادارانی هەرێمی کوردستان.

گرۆپێک لە چالاکوانانی ڕەوەندی کوردی
میلبۆرن/ ئوسترالیا
27/8/2016