کۆنگره‌ی سێهه‌م و ( کوڕانی سێوله‌باخه‌ڵ )
 

  

نوسینی : سه‌عید عارف


پاش ڕاپه‌ڕین و هه‌ڵبژاردنی په‌ڕله‌ما ن ، له‌کاتێکدا ترسی شه‌رعیه‌تی شاخ وچه‌کداری شۆڕش ڕو ی له‌ ئاوا بوون بوو . به‌مۆدێلی ‌هه‌ڵبژاردن و ڕواڵه‌تکاری دیموکراتی ، گه‌مه‌یه‌کی نوێ هاته‌ ناو ده‌زگا کانی پێشووی شۆڕشه‌وه‌ .

به‌ڵام وه‌کو سه‌ره‌نجامێک ، بۆ نوێخوازیه‌کی ڕاسته‌قینه‌ نه‌بوو به‌ڵکو بۆ مانه‌وه‌ و به‌رده‌وام بوونی ده‌زگا کۆنه‌که‌و نوێ کردنه‌وه‌ی شه‌رعیه‌تی حیزب بوو .

دیموکراتی ڕواڵه‌تکاری و بی ناوه‌رۆک بووبه‌ گه‌مه‌و مۆدێلێک له‌ زۆر کایه‌ی کۆمه‌ڵگادا .

((1))

بۆیه‌که‌م جار ئه‌و ڕاستیه‌م له‌ ڕوداوێکه‌وه‌ هه‌ست پێ کرد .کاتێک براده‌رێکی هونه‌رمه‌ندم بانگی کردم بۆ کۆبونه‌وه‌یه‌ک له‌خانویه‌ک دا که‌ میراتی باوانی که‌سێکی نزیک به‌ده‌سه‌ڵاتی سیاسی بوو . دیاره‌ له وکاته‌وه‌ ، به‌دووی ده‌سه‌ڵاتێکی سیاسی ڕاسته‌وخۆ و دامه‌زراو تر دا ئه‌وداڵ بوو .
ده‌یه‌ویست له‌ کایه‌ی هونه‌رو هونه‌رمه‌ندانه‌وه‌ پێگه‌که‌ی خۆی ده‌ست پێ بکات . له خانویه‌کی ناوبازاڕدا ، چه‌ند نوسه‌رو هونه‌مه‌ندێک گردکرابوونه‌وه‌ ڕاوێژی پێ ده‌کردن چی له‌و موڵکه‌ میراتیه‌ی بکات بۆ خزمه‌تی هونه‌ر . پێش تر بیست بوم ده‌یکات به‌گه‌له‌ری هونه‌ری . لام سه‌یر بووموڵکێکی بچوکی باوان چی پێویستی به‌و ڕاوێژوو ڕاوه‌رگرتنه‌یه‌ ، له‌ کاتێکدا پێش تربڕیاری خۆی لی دابێت له‌وێدا شێوه‌کی له‌ ڕاوێژو پرنسیپی دیموکراتی نواند بۆ نزیک کردنه‌وه‌ی که‌سانی ئاماده‌بوو .. بۆیه‌که‌م جار هه‌ستم ده‌کردئیمه‌ هه‌ریه‌که‌مان خۆی به‌کوڕی سێو له‌باخه‌ڵ ده‌زانێت‌ ، هه‌ستم به‌دڵگه‌رمیه‌کی گشتی ده‌کرد بۆ‌ کارو خزمه‌ت کردنی پرۆژه‌کانی ئه‌و به‌ڕیزه‌ له‌ ژێر سۆزی (کوڕی سێو له‌باخه‌ڵ )دا . دواجاریش ئه‌و خانووه‌ له‌مولکێکی ساکاری میراتیه‌وه‌ ده‌بوو به‌شوێنێکی بزنسی چاک و کڕینی شوینانی تری هاوشیوه‌ به‌و موڵکه‌ . ئه‌وانه‌ مافی ساده‌ی که‌سێکه‌ که‌بیکات بۆ خۆی ، به‌ڵام له‌وێدائه‌جێندایه‌کی قوڵ تر هه بوو . ئه‌ویش بۆ زیاتر به‌ناوبانگ کردن وزیندوو ڕاگرتنی بنه‌ماڵه‌که‌ی بۆ هاوتایی کردنی حیزبه‌ دژبانه‌که‌ی ، که‌ له‌سه‌ر بناغه‌ی بنه‌ماڵه‌یی سه‌روه‌ری ده‌سه‌ڵاتی خۆیان بنیات ناوه‌ .
ئه‌گه‌ر که‌سێک له‌و ده‌مه‌دا باسی بنخانی ئه‌م ڕاستیانه‌ی بکردایه‌ ، که‌سانی نزیک به‌گژی دا ده‌چونه‌وه‌ .
ئه‌و به‌ڕیزه‌ پاش ئه‌وه‌ی له‌م کۆنگره‌یه‌دا گه‌یشته‌ شوێنی دڵخوازی سیاسی خۆی ، ده‌سه‌ڵاتی بنه‌ماڵه‌یی لای بووه‌ به‌ ئامانجی سه‌ره‌تاو کۆتایی له‌حیزب دا ، بێ ئه‌وه‌ی هیچ ڕوگیربیت یان عوزرێک بهێنێته‌وه‌ بۆ پرینسیپه‌ سه‌ره‌تاییه‌ کانی ده‌سپێکی شۆڕش و بزوتنه‌وه‌که‌ ، دژ به‌ بنه‌ماکانی کۆنه‌په‌رستی ‌ده‌ره‌به‌گی و خێڵه‌کی و حیزبی بنه‌ماڵه‌یی بوون .

((2 ))

له‌ڕوداوێکی قه‌به‌تری هاوشیوه‌دا دوای ڕوخانی به‌عس و دۆلاری هه‌ڵڕژاوه‌وه‌ ، له‌ هه‌ولێری پایته‌ختی هه‌رێم دا ، بنکه‌یه‌کی چاپ و بڵاوکردنه‌وه‌ی حیزب به‌ناوی دابه‌ش کردنی خه‌ڵاتی رێزلێنان له‌ به‌رهه‌می ئه‌ده‌بی ، وه‌کو پیشاندانی ڕوی دیموکراتی و یه‌کسانی . چه‌ند نوسه‌رو شاعیرو وه‌رگێڕی له‌ناوه‌و ده‌ره‌وه‌ی ووڵات بانگێشت کردبوو . دوای ئاهه‌نگی به‌خشینی خه‌ڵاته‌که‌ ، کڵاو کرا به‌سه‌ر هه‌موو ئه‌وانی ترداو ، چونکه‌ مه‌به‌ست له‌وێدا ته‌نها بۆ پاداشت و ڕیزدار کردنی نوسه‌رو شاعیرو وه‌رگێڕێکی خۆیان بوو ، که‌ به‌رهه‌مه‌کانی به‌ دڵخوازی حیزب نوسی بوو . له‌وێدا هه‌موو ئه‌و نوسه‌ ر و وه‌رگێرو شاعیره‌ به‌ڕیزو ناودارانه‌ی تر کرابوون به‌(کوڕی سێو له‌باخه‌ڵ)(*) بۆ مه‌رامێکی پێشینه‌ی حیزب که‌ شکۆمه‌ند کردنی که‌سایه‌تی ئه‌و نوسه ر‌ه‌ بوو . هه‌ر چه‌نده له‌تۆڵه‌یدا نوسه‌رو شاعیره‌کڵاو له‌ سه‌رنراوه‌کان ‌ ڕه‌خنه‌ی زۆریان له‌ سه‌ر ئاهه‌نگ وبۆنه‌که‌ نوسی ، به‌ڵام بنکه‌ میدیاییه‌ که ‌ئه ڕاسپارده‌ سیاسیه‌که‌ی حیزبیان به‌ باشی به‌جێ هێنابوو ، هیچ نه‌مایه‌وه‌ ته‌نها کڵاوی قوچ و به‌ژنی ته‌ڕی ئه‌و نوسه‌ره‌ ئاوبه‌سه‌راکراوه‌نه‌ نه‌بێت ، ئه‌وانه‌ی کرابونه‌ دیکۆری ڕێزلێ نانی یارۆی حیزب.

((3 ))

جاران گه‌مه‌کانی ڕاوێژکاری و هه‌ڵبژاردن و سێوله‌باخه‌ڵ نان له‌په‌راویزه‌کانی سیاسه‌ت و کایه‌ی دوور تری حیزب دا بوو ن . وه‌لی هه‌نوکه‌ پاش ئه‌و تاقی کردنه‌وه‌ سه‌رکه‌وتووانه‌ . پرۆسه‌که‌‌ گواستراوه‌ته‌وه‌ بۆ ناوه‌ندی سیاسه‌ت و چه‌قی دابه‌ش کردنی ده‌سه‌ڵاتی حیزب .

له‌ کۆنگره‌ی سێهه‌می یه‌کێتی نیشتمانی دا پاش ئه‌وه‌ی لاوان وڕۆشنبیرانی حیزب باوێکی زۆریان پێ دراو خرانه‌ ڕاوێژه‌وه‌ و به‌پرۆسه‌ی هه‌ڵبژاردنی ناوخۆیی دا ،هه‌ڵبژێردران بۆ ئه‌ندامی کۆنگره‌ بۆ نوێ کردنه‌وه‌ ی گیانی حیزب و نوێ کردنه‌وه‌ی شه‌رعیه‌تی ده‌سه‌ڵات . به‌ڵام به‌ ئه‌جیندایه‌ک که‌میراتگره‌کانی کۆنی حیزب خاوه‌نی بوون ، هه‌مو گه‌نج و ڕۆشنبیره‌ نوێخوازه‌کان بوون به‌ (‌کوڕی سێو له‌باخه‌ڵ)و کران به‌دیکۆرێکی ڕواڵه‌تی شه‌رعیه‌ت دان به‌ پاسه‌وانه‌ کۆنه‌کانی حیزب و پاش ده‌رچونه‌وه‌ی ده‌سته‌کۆنه‌که‌ی سه‌رکردایه‌تی ، ئاوی سارد کرا به‌سه‌ر ئه‌مانیش دا و ته‌نها‌ قه‌وانێکی به‌تاڵیان لێ مایه‌وه‌ .

ــ گێلێتیه‌ خۆمان له‌ ڕاستیه‌ک لابده‌ین .

ئه‌ویش ئه‌وه‌یه‌ هه‌نوکه‌ له‌کوردستانی هه‌رێم دا ، یه‌ک هێلی مێژوویی هه‌ژمونی ئه‌جیندای خۆی سه‌پاندووه‌ که‌ له‌ 16ئابی 1946ی دامه‌زرانی پارتێکی سیاسیه‌وه‌ تائیستا به‌رده‌وامه‌ . تاکه‌ میسۆده‌ ، ساڵانی ته‌مه‌نی سیاسی خۆی به‌ هه‌موو وه‌رزه‌ پایزی و به‌هاریه‌کانیه‌وه‌ تائێستا هیناوه . هه‌رچی ناکۆکی و جیابونه‌وه‌یه‌کیش له‌و پارته‌ دا ڕوی دابێت به‌ناکامی پاش گه‌زبونه‌وه‌ کۆتایی هاتووه‌ .
پڕ ده‌وامترین و به‌تین وتاوترین جیابونه‌وه‌ ک له‌پارتی دایک نزیکه‌ی سه‌رو 45 ساڵی خایاند ، له‌ئێستاکه‌دا خه‌ریکی (بادانه‌وه‌) و په‌شێمان بونه‌وه‌یه‌کی وورده‌ وورده‌ و هه‌نگا و به‌هه‌نگاوی ده‌سکردی و دراماتیکیه‌ ، ، له‌ئاینده‌یه‌کی چاوه‌ڕوان کراودا به‌ره‌و کۆپی بوون یان جوت بوون ده‌چێت له‌سه‌ر وێنه‌ و خودی پارتی دایک .

ئه‌گه‌ر جاران مێژووی (ی .ن.ک) به‌ تیۆریزه‌کاری بزوتنه‌وه‌یه‌کی دژی کۆنه‌په‌رستی وده‌ره‌به‌گی خێل و بنه‌ماڵه‌چێتی ناو بزوتنه‌وه‌ی کوردایه‌تی ده‌خوێنرایه‌وه‌ . به‌ڵام هه‌نوکه‌ له‌سۆنگه‌ ڕاستی یه‌کانی دواسه‌ره‌نجامی نزیکه‌وه‌ ، نه‌ک دژ ی کۆنه‌په‌رستی پارتێک نه‌بووه‌ ، به‌ڵکو ئه‌و پێنوسه‌ سوروس تۆخه‌‌ بووه‌ ، که‌ هه‌میشه‌ سنوره‌کانی پارتی دایکی به‌ڕاسته‌و خۆو ناڕاسته‌وخۆ پێ تۆخ کراوه‌ته‌وه‌ .

کورد ده‌لێت : ( ده‌ستێک به‌ته‌نها چه‌پڵه‌ لێ نادات )، هه‌موو بونێک پێویستی به‌ دژێکی خۆی هه‌یه‌ که سنورو سیمای خۆی پێ ده‌ستنیشان بکات .
له‌ 1964وه‌ ، به‌ڕاستی بونی باڵێکی جیا بووه‌وه‌ی پارتی ــ وه‌کو مه‌کته‌بی سیاسی ــ زۆر گرنگ و بووه‌ بۆ ژیان به‌خشین به‌ پارتی له‌ناو خۆیدا . ‌ هه‌رچی ڕیکخراو پارتی تره‌ له‌پێش ئه و‌مێژووه‌و له‌دواتریشی دا له‌به‌ر نه‌بونی دینامیکێکی له‌و جۆره‌ ، خۆبه‌خۆ توشی سستی وسارد بونه‌وه‌ هاتوون و دواتر له‌کاڵ بونه‌وه‌یه‌ک د ا کۆتاییان هاتووه‌ . حیزبی هیوا نمونه‌یه‌که‌ بۆ ئه‌م ڕاستیه‌ .
پارتی پاش ساڵی 1964وه‌ له‌کاتی گفتوگۆ یان لاوازی ده‌سه‌ڵاتی سه‌رده‌ستی حوکومه‌ته‌ عیراقیه‌ یه‌ک له‌دوایه‌که‌کانه‌وه‌ ، هه‌رگیز توشی خاوبونه‌وه‌ و سستی خه‌بات نه‌بووه‌، ئه‌ویش به‌هۆی شه‌ڕی ناوخۆی باڵی مه‌کته‌بی سیاسیه‌که‌یه‌وه‌ ، که‌ هه‌میشه‌ بۆی بووه‌ به‌ ماکی مانه‌وه‌ و به‌رده‌وامیه‌ک ، تاگۆڕانی یه‌ک له‌ دوایه‌کی ده‌سه‌ڵاتی عێراقیه‌وه‌ که‌توانیویه‌تی سێ حوکومه‌ته‌ کوده‌تاچیه‌کانی ، قاسم و ، عارفه‌کان و ،به‌عس ، به‌ڕی بکات . له‌هه‌ریه‌کێک له‌ و ده‌سه‌ڵاته‌ کوده‌تا به‌سه‌ر کراوانه‌دا ، پارتی به‌ جۆرێک گۆڕانی زروفی سیاسی به‌هره‌مه‌ند بووه‌ ، که‌به‌ ده‌سکه‌وتی سیاسی بۆی هاتۆته‌ حساب ، که‌ دواترینیان به‌یانی 11ئازارو دانپیانی حوکومه‌تی به‌عسه‌ به‌ بونی به‌رامه‌به‌رێک داوبه‌داننان بوو به‌ ‌مافی نه‌ته‌وه‌یی دا و به‌قۆناغ بڕێنێک وده‌ست که‌وتی گرنگی پارتی که‌وته‌وه‌ ، که‌ جار جاره‌ ، پارتی دیموکرات و عه‌ره‌بی شۆڤێنی ، به‌منه‌تێک‌ ده‌یده‌نه‌وه‌ به‌چاوی میلله‌تی کورد دا .

بۆیه‌ ده‌بێت هه‌میشه‌ پارتییه‌کی وه‌ها سوپاس گوزاربێت له‌ مه‌کته‌بی سیاسیه‌ لێ هه‌ڵگه‌ڕاوه‌که‌ی ، که‌ گیانی مانه‌وه‌ و به‌رگری به‌زیندویی تیا هێشتۆته‌وه‌ ، تا به‌ئاکام گه‌یشتنی قۆناغه‌کانی .

له‌وێوه‌ بۆ ئێستا ، بڕوام وایه‌ ده‌کرێت خوێندنه‌وه‌یه‌کی نوێ بۆ ئه‌و مێژووه‌ ده‌ست پێ بکه‌ینه‌وه‌ ، جیاوازه‌ له‌ دابه‌ش کردنه‌ مێژووییه‌که‌ی پێشوو که‌ تیایدا لایه‌نێک به‌ کۆنه په‌ره‌ست و لایه‌نه‌که‌ی تر به‌نوێگه‌ر حساب ده‌کرا .

له‌زوربه‌ی کات دا ، به‌ڕاستی ، ته‌واو که‌ری یه‌کتری بون ، پارتی دایک وێنه‌و سیمای خۆی به‌هێڵه‌ سوره‌کانی لایه‌نی لێ هه‌ڵگه‌ڕاوه‌که‌ی خۆی نه‌خشاندووه‌ ، هه‌روه‌ها لایه‌نی هه‌ڵگه‌ڕاوه‌ش بیانوی بونی خۆی له‌ پارتی دایکه‌وه‌ وه‌رگرتووه‌و هه‌تا ئه‌م نزیکه‌ی پێ ی به‌رده‌وام بووه‌ ، به‌ڵام چی تر له‌به‌ر سه‌ره‌نجامه‌ نوێکانی ئیستاکه‌دا تێزی ئه‌و لێکدانه‌وه‌یه‌ به‌سه‌رچوه‌ و ، هه‌ویره‌که‌ی بزڕکاوه وئیتر هیچ کولێره‌کی نوێی لێ نایه‌ت ‌ .

له‌به‌ر گۆڕانه‌کانی ئێستای ناوچه‌که‌و جیهان دا ، ئیتر گه‌مه‌ی مشک و پشیله‌ ئه‌م دوو حیزبه‌ هیچ سه‌رنجڕاکێشی و کاریگه‌ریه‌کی نه‌ماوه‌ ، خۆشیان ده‌زانن وه‌رزی چنینه‌وه‌ی به‌رهه‌مه‌کانه‌ له‌ ده سه‌ڵات و سامانی ڕژاودا . ئیتر پاش شه ڕه‌ دورو درێژو ناماقوڵه‌کانی ناوخۆ هه‌رچی ڕێک که‌وتنێکی وه‌رز به‌سه‌رچوو ده‌که‌ن ناکاته‌ هیچ ، خۆ ئه‌گه‌ر له‌وه‌رزی خۆیدا بوایه‌ دایکه‌ کوڕ کوژراوه‌کانیش ده‌مبه‌خه‌نده‌ ده‌بون وخوێنی ڕۆڵه‌کانیان نۆبه‌خشی ده‌کرد، به‌ڵام له‌ ئێستاکه‌دا ئه‌ ڕێک که‌وتنه‌ ئێکسپایه‌ره‌ ده‌که‌ن به‌منه‌ت به‌سه‌ر میلله‌ته‌‌وه‌ ، له‌کاتێکدا جگه‌ له‌ خۆیان که‌سێک نیه‌ چه‌پڵه‌یه‌کی ساردیش بۆ ئه‌و بۆنه‌یه‌ لێ بدات .

له‌کاتێکدا ئه‌ و ڕێکه‌وتنه‌ بۆ دابه‌ش کردنی پاداشته ماڵی سولته‌ییه‌کانه‌‌ ، به‌ قۆرغ کراوی بۆ وازی که‌رو گه‌مه‌چیه‌ کۆن و به‌جێماوه‌کانی مێژوی خوێناوی هه‌ردو لایه‌نه‌که‌ و ئه‌وه‌شی له‌خۆیان ده‌مێنێته‌وه‌ ده‌یده‌ن به‌وانه‌ی ئاماده‌ن ده‌زگا کۆنه‌کانیان بۆ هه‌ڵسوڕێنن .
بۆیه‌ پێویستیان به‌هاوشێوه‌بون یان یه‌ک پێگرتنه‌وه‌ی ده‌زگاکانیانه‌ بۆ ئاسان گواستنه‌وه‌ و گوێزانه‌وه‌ی ده‌سه‌ڵات و سامانی تاڵانی میلله‌ته‌دۆشداماوه‌که‌ .

بۆیه‌ ئه‌وه‌ی ده‌یبینین له‌دوانمونه‌دا و له‌کۆنگره‌ی سێهه‌می (ی .ن.ک) دا
هه‌ڵگه‌ڕانه‌ویه‌که‌ له‌ پرنسیپه‌کانی سه‌ره‌تایی خۆیان و پاش گه‌ز بونه‌وه‌یه‌ له‌ مێژووی خۆیان وتوڕدانی ڕابوردووه‌ .

به‌جۆرێک ئه‌م کۆنگره‌یه‌ یه‌که‌م وه‌رچه‌رخانی قورس و گران بوو له‌ ئاڕاسته ی‌ سه‌ره‌تا ی یاخی بونێک له‌پارتی دایک . یان به‌دیوه‌که‌ی تردا بڵێن گه‌ڕانه‌وه‌یه‌ به‌ره‌و ماڵی سه‌ره‌تای باوان ، له‌وێدابانگاشه‌ی مێژویه‌کی سه‌رو 45 ساڵی پێشکه‌وتن خوازی پوچ ده‌بێته‌وه‌ .

ــ داهاتوی حیزب چۆن ده‌بێت ؟

ئه‌گه‌ر ڕۆشنبیران و لاوان له‌م قۆناغه‌دا منه‌تێک به‌وان هه‌بوو یان کۆسپێک بوون له‌ڕێی پاسه‌وانه‌ کۆنه‌کانی حیزب دا ، وه‌لێ به‌هه‌رجۆرێک بێت توانرا بکرێن به‌(کوڕی سێو له‌باخه‌ڵ) ، له‌قۆناغه‌کانی ئاینده‌ دا هه‌ر گۆڕینێک ئاسان ترو سوک تر دێن به‌ده‌سته‌وه‌ له وێدا ئه‌و منه‌ته‌ش به‌ لاوان وڕۆشنبیران نامێنێت چونکه‌ ئه‌وان ئیتر له‌سه‌ر ڕێگادا نه‌ماون . پاسه‌وانه‌ کۆنه‌کان ڕوقایم ‌ترێک هه‌نگاوی کۆپی کردن یان جوت بوون هه‌ڵده‌نێن له‌گه‌ڵ خودی پارتی دایک دا ، چونکه‌ به‌و جۆره‌ سامانی ڕژاو ، ده‌سه‌ڵاتی ده‌سکه‌وتوو ، مسۆگه‌ر ترێک ده‌پاریزرێت .

ــ دواسه‌ره‌نجام

کوڕانی سێو له‌باخه‌ڵ ، ته‌نها دیکۆرێک بوون بۆ ڕایی کردنی گه‌مه‌کانی دیموکراتی و‌ هه‌ڵبژاردن ، له‌سه‌ر شێوازه‌ ڕۆژهه‌ڵاتیه‌که‌ی که‌ دیوێکی تری فلس و دراوه‌ کۆنه‌که‌ی (ئیستیبدای ڕۆژهه‌ڵاتی) یه‌ ، ئه‌ویش بۆ خۆی باسێکی تره‌ ، چونکه‌ ده‌سه‌لاتی ئیستاکه‌ی کورد ، گه‌ردێکی بچوکه‌ له‌و فه‌له‌که‌ گه‌وره‌یه‌دا .

خۆئه‌گه‌ر ئه‌م باسه‌ له‌ ده‌زگاو پارتی ده‌سه‌ڵاتداره‌وه‌ وه‌ربگێڕین بۆ سه‌ربوردی سه‌رۆکی حیزب ، یان به‌که‌سایه‌تی کردنی مێژووه‌ خوێندراوه‌که‌ . ئه‌وه‌ ده‌بێت بچینه‌ سه‌ر شێوازی سه‌رنج ڕاکێشی گێڕانه‌وه‌کانی سه‌ره‌ڕۆیی و سه‌رچڵی قاره‌مانانی ناو (هه‌زارویه‌ک شه‌وه‌ )ی شه‌هرزاد .

26 ــ 06 ــ 2010‌

saidaraf@hotmail.com




تێبیــــــــــــنی
ــــــــــــــــــــــــ :
(*)(کوڕی سێوله‌باخه‌ڵ)
له‌ گێڕانه‌وه‌یه‌که‌وه‌ هاتووه‌ . کاتێک ماڵه‌ جوتیار کچی پێ ده‌گات ، پێی ده‌لێن ، سێبه‌ری ماڵی خۆش بووه‌ ، به‌مانای ئه‌وه‌ی ئیتر کوڕو کاڵی گه‌نج حه‌ز به‌سه‌ردان و کارو کۆمه‌کی ماڵه‌ جوتیاره‌که ‌ده‌که‌ن به‌ته‌ماحی دڵ به‌ده‌ست هێنانی کچه‌که‌یان . کاتێک گه‌نجه‌کان‌ کارو هه‌ره‌وه‌ز بۆ ماڵه‌ جوتیاره‌که‌ ده‌که‌ن ، به‌ ئاسایی زۆر له‌ماڵه‌ جوتیاره‌کان ، له‌شوێنی کارکردنی لاوه‌کان دا بوار به‌کچه‌پیگه‌یشتووه‌که یان ده‌ده‌ن ، نزیکی قسه‌و ڕازگۆرینه‌وه‌ له‌گه‌ڵ لاوه‌ هه‌ره‌وه‌ز کردووه‌کان دا بکات . له‌م گێڕانه‌وه‌یه‌دا کچی پێگه‌یشتوی جوتیاره‌که‌ فێل بازو زرنگ ده‌بێت‌ له‌په‌ناوه‌ به‌جیاجیا سێوی به‌خشیوه‌ته‌ هه‌ریه‌ک له‌ کوڕه‌ گه‌نجه‌کان و له‌ کاتی هه‌ره‌وه‌زێکی وه‌کو ساوه‌ر کوتان دا بۆ گه‌رم کردنی کوڕه‌کان ، زوو زوو کچه‌ قوته‌که‌ ده‌ڵێت : ئای به‌قوربانی بازو کوته‌کی کوڕی سێو له‌باخه‌ڵ بم ، هه‌ریه‌ک له‌کوڕه‌ سێو پێ به‌خشراوه‌کان خۆی به‌ گراوێ و ده‌زگیرانی داهاتوی کچی جوتیار ده‌زانێت ، ئیتر خۆی ده‌پڕوکینێت بۆ کاره‌که‌.



 

           

 

30/06/2010

 

goran@dengekan.com

 

dengekan@yahoo.com