به‌ته‌نیا هه‌ر ماف نی یه‌ ! جگه‌ له‌کرده‌یه‌کی ڕێکخراوه‌یی و به‌رپرسیاریه‌تی مێژوویی بۆ خودی ئه‌ندامیش ئه‌رکێکی ویژدانی و ڕه‌وشتی یه‌ . له‌هه‌ر کام پۆزسیۆنی گچکه‌ و گه‌وره‌ی حیزبیه‌وه‌بێ هه‌ڵبژێره‌ر ده‌بێ وردبین و ژیرانی تاده‌کرێ دوور له‌سۆز بڕیاری دروست بدا ، جگه‌ له‌مێژووی ژیانی کاندیده‌که‌ که‌ هه‌رخۆی به‌رپرسه‌ له‌ چاکی و خراپیه‌کانی به‌ستنه‌وه‌ی به‌ئێستا که ‌چی پێ یه‌ و چی پێ ده‌کرێ ؟ سێ خاڵی سه‌ره‌کی دیده‌بگرێ که‌ له‌کاندیده‌که‌ی دا هه‌بێ ( بیروبۆچوون ، توانست ، شیاوی ) واته‌ هه‌ڵگری یا داهێنه‌ری بیری تایبه‌ت و به‌رنامه‌ی گشتگیری به‌قازانجی هه‌مووان ، توانای لێکدانه‌وه‌ی زانستی‌ ، به‌رگه‌ و خۆڕاگری کایه‌کان ، ئه‌گه‌ر تواناشی هه‌بوو ده‌بێ شیاوی جێگه‌ ته‌رخانکراوه‌که‌ بێ له‌ڕووی ته‌مه‌ن ، ته‌ندروستی و گونجاندا . له‌وه‌یه‌ که‌سێک بیروبۆچوونی هه‌بێ به‌ڵام تواناو شیاوی شوێنه‌که‌ نه‌بێ به‌پێچه‌وانه‌کانیشیه‌وه‌ ئه‌گه‌ر هه‌ریه‌کێکیانی که‌م بێ یا وه‌ک پێویست نه‌بێ ڕه‌وایه‌ بیر له‌کاندیدی تر بکرێته‌وه‌ .
داره‌ سه‌وزه‌که‌ ..
هه‌موو ساڵی دره‌خته‌کان هه‌رپه‌ردافتنیان ده‌وێ لق و چڵه‌ زیاد و خواره‌کانی ده‌بڕدرێ به‌نیازی به‌هێزبوون ، جوانی و پڕبه‌رهه‌مکردنی ئینجا داره‌ سه‌وزه‌که‌ی یه‌کێتیش کاتی ڕێکخستنه‌وه‌ی هاتووه‌ به‌و ئاگاییه‌ی که‌ هه‌ر لقێکی بڕین ئاکامیه‌تی نابێ بیسوتێنین و فڕێ ی بده‌ین به‌ڵکو وه‌ک باخه‌وانه‌کان بڕاوه‌کان ده‌هاڕن وه‌ک په‌ینی سروشتی بیخه‌ینه‌وه‌ ژێر داره‌که‌ تا ماده‌ به‌سوده‌کانی له‌خاکه‌وه‌ ببه‌خشێته‌وه‌ به‌ڕه‌گه‌کان . ئه‌گه‌ر ڕه‌گه‌کان چه‌ند شاڕه‌گ و توله‌ ڕه‌گێکن به‌قه‌ده‌وه‌ به‌ندن ماده‌ بنه‌ڕه‌تیه‌کان دابین ده‌که‌ن و ده‌گه‌یه‌نن هۆکاری سه‌ره‌کی چه‌سپان یا گه‌وره‌بوونن به‌سه‌رکردایه‌تیان بچووێنین ئه‌وا لق و چڵ و گه‌ڵاکانیش ئه‌ندام و لایه‌نگرانن که‌ به‌هۆیانه‌وه‌ جوانی و سه‌وزی ژیان کرداری ڕۆشنه‌پێکهاتن بۆ ته‌واوی داره‌که‌ دابین ده‌که‌ن واته‌ سه‌روژێر ته‌واوکه‌ری یه‌کترین . داره ‌سه‌وزه‌که‌ش ئۆرگانی یه‌ چه‌ندان نه‌خۆشی لێیداوه‌ چاره‌سه‌ریش پێویستیه‌ تابتوانێ جوان و به‌هێز و به‌رداربێ له‌سایه‌ی سێبه‌ر و به‌رهه‌می هه‌موومان پشووی حه‌سانه‌وه‌ بده‌ین .
ڕه‌خنه‌ی به‌خۆداچوونه‌وه‌ ..
زانست به‌گومان و ‌ڕه‌خنه‌ پێش ده‌که‌‌وێ له‌هه‌ر لێکدانه‌وه‌ و داهێنانێك شک هه‌یه‌ که‌ زیانی لاوه‌کی هه‌بێ و که‌م بکرێته‌وه‌ یا باشتر و پێشکه‌وتووتر داهێنان بکرێ . وادام حیزب ماده‌یه‌کی ئۆرگانی یه‌ و له‌مرۆڤ پێکدێ بێشک نه‌هاته‌ی باری خۆیی و باری ده‌ره‌کی سستی په‌که‌فته‌ی ده‌کا بۆ باشترکردنی سیسته‌می کار و داهاتووی جۆری به‌رهه‌مه‌کان ڕه‌خنه‌ و ڕه‌خنه‌له‌خۆگرتن پڕۆسه‌یه‌کی خۆسه‌پێنه‌ره‌ ، ده‌سنیشانی برین و هه‌ڵدانه‌وه‌ی قه‌تماغه‌کان ئه‌گه‌ر ژانیشی هه‌بێ پێویستیه‌ بۆ تیمار و چابوونه‌وه‌ . هه‌ر له‌شێکیش ساغ و ته‌ندروست نه‌بێ ناکرێ بیری باش و به‌رهه‌می باشی هه‌بێ . ڕه‌خنه‌ی زانستی ئه‌و ڕه‌خنه‌یه‌‌ له‌سیسته‌می کار ده‌گیرێ نه‌ک ته‌نیا ناوزڕانی به‌رپرس و تاکی ئه‌ندامان ، واته‌ گه‌ر سیسته‌مه‌که‌ هه‌ڵه‌بژێر بکرێ ئه‌وا باشتره‌ له‌ڕه‌خنه‌ی ئاڕاسته‌ی هه‌ڤاڵان هه‌روه‌ها باشتره‌ ڕه‌خنه‌گر له‌پێشه‌وه‌ ڕه‌خنه‌ی له‌خۆی گرتبێ تا ڕه‌خنه‌که‌ی وه‌ک پێشنیار لێ وه‌ربگیرێ و جێ به‌جێ بکرێ .
یه‌کێتی یه‌کێتیه‌کان ..
به‌واتای وشه‌یی ئێستا و پێویستی مێژووه‌ ده‌رهاوێشته‌که‌ی یه‌کێتی بۆ یه‌کێتی جیاوازیه‌کانه‌ . ڕسته‌که‌ی به‌ڕێز مام جه‌لال: یه‌کێتی ڕیزه‌کانی ناو یه‌کێتی هه‌روه‌ها ماڕشی یه‌کێتی هۆنراوه‌که‌ی مامۆستا شێرکۆ بێکه‌س: مه‌شخه‌ڵانی شۆرشی نوێ ی ئه‌م جاره‌ واته‌ هه‌ر مه‌شخه‌ڵێک نی یه‌ ! جگه‌ له‌هه‌ر دیارده‌یه‌کی به‌ڵگه‌نه‌ویستی تری لێکترازانی ڕه‌وت و باڵ و گروپه‌ جیابۆوه‌کان ئێستاش له‌ناو یه‌کێتی نیشتمانی کوردستان به‌سته‌ک ( ته‌که‌تول ) هه‌یه‌ و کاری پێ ده‌کرێ . پێم وایه‌ دیارده‌یه‌کی ته‌ندروست بێ کێشه‌یه‌ گه‌ر تیم و به‌سته‌که‌کان ئه‌رێنی بن واته‌ له‌به‌رژه‌وه‌ندی خۆیان له‌ژێر ساپیته‌ی به‌رژه‌وه‌ندی گشتی و به‌قازانجی یه‌کێتی کاربکه‌ن . نمونه‌یه‌کی ساده‌ مرۆڤ له‌گه‌ڵ خوشک و برای خۆی به‌سته‌ک ده‌کا و جار هه‌یه‌ دوانی له‌وانی تر خۆشترده‌وێ یا بڕوا و متمانه‌ی زیاتریان پێده‌کا . که‌واته‌ دۆزینه‌وه‌ی خاڵی ئامانجی هاوبه‌ش ، قازانجی هاوبه‌ش ، په‌ستۆی دوژمنی هاوبه‌ش ، شیاوترین ڕێگه‌چاره‌ی گونجان و ته‌بایی یه‌کێتی یه‌کێتیه‌کانه‌ ڕاستیه‌که‌ خۆکه‌سمان لێ زیاد نی یه‌ به‌ڵێ پێویستیمان به‌هه‌مووانه‌ .
بیری گه‌نجانه‌ ..
ته‌مه‌نی گه‌نج یا بیری گه‌نج ده‌خه‌ینه‌ پێش نیشانه‌ی پرسیاره‌وه‌ ؟ کامیتان ده‌وێ پیاوێکی ته‌مه‌نداری بیرگه‌نج و گه‌نجپارێز یا گه‌نجێکی ته‌مه‌ن هه‌رزه‌ی بیر پیر و کۆنه‌پارێز باشتره‌ ؟ نوێکردنه‌وه‌ په‌یوه‌ست نی یه‌ به‌ته‌مه‌نه‌وه‌ ئه‌وه‌ندی په‌یوه‌سته‌ به‌بیر و نیازه‌وه‌ . یه‌کێتی هه‌رله‌سه‌ره‌تاوه‌ ڕێکخراوی گه‌نجان بوو ژماره‌یه‌کی زۆری سه‌رکرده‌کانی سه‌ره‌تای شۆڕش هه‌ر گه‌نج بوون له‌شه‌هیدان ئارام ، ئازاد هه‌ورامی ، حه‌سه‌ن کوێستانی ..... به‌ڕابه‌رایه‌تی مامێکی گه‌نجی ئه‌و سه‌رده‌مه‌ له‌گه‌ڵ زیندوه‌کانی ئێستا که‌ پیربوون یا به‌رو پیری ده‌ڕۆن هاوتا ڕێکخستن و زیندانی و پێشمه‌رگه‌ دێرینه‌کانیشی . خۆ ئه‌گه‌ر گه‌نجێکیش له‌ڕێکخستنی نوێ چه‌پکه‌ گوڵه‌که‌ له‌دوای ئه‌وان هه‌ڵنه‌گرێ ئه‌وا گه‌نجینه‌ی خه‌باتی ئه‌وانیش به‌هه‌ده‌ر ده‌چێ و مه‌رجیش نی یه‌ ئه‌و‌ گه‌نجه‌ هه‌رکه‌س و برا و برازای به‌رپرسان بێ ! یا که‌سێکی ساده‌ی بێ زانیاری و هه‌ڵنه‌گری مه‌رجه‌کانی سه‌رکردایه‌تی بێ چونکه‌ گه‌نجه‌ به‌پێش خۆمانی بده‌ین به‌ڕه‌چاوی ئه‌وه‌ی ناوه‌ڕاستی ته‌مه‌ن دوای نیوسه‌ده‌ش له‌ژیان هه‌رگه‌نجی یه‌ .
فۆڕماتی ئه‌ندامه‌تی ..
ڕۆشه‌نبیری ڕێکخراوه‌یی ، سه‌رنجکێشان له‌سزا و پاداشت ، دیسپلین و ئینتما بۆ کێ یه‌ ؟ حیزب یان که‌س و به‌سته‌کی نه‌رێنی که‌ له‌به‌رژه‌وه‌ندی گشتی لایان داوه‌ ! پیرۆزی ئه‌ندام بوون له‌وه‌دایه‌ وا به‌ئاسانی شکۆی سه‌روه‌ری ئه‌ندامه‌تی وه‌رنه‌گرێ به‌ڵکو قۆناغی لایه‌نگری چه‌ند مانگێک بخایه‌نێ و هه‌وڵی هۆشیاری بووێ نه‌ک به‌مانگێک به‌بێ فلته‌ر ببێ به‌ئه‌ندام هه‌موو مافێکیشی هه‌بێ ! سه‌رلێشێوان بێ زانینی توانای خودی بۆ هه‌موو پێگه‌ و ئۆرگانێک خۆی هه‌ڵبژێرێ ، هه‌ڤاڵینه‌ خۆ چوونه‌ کۆنگره‌ حه‌ج کردن نی یه‌ دواییش پاداشتی چوونه‌ به‌هه‌شت بێ ! کاری ڕێکخستن تایبه‌تمه‌ندی و کارایی ده‌وێ چۆن تیپێکی تۆپانێ گۆڵچی و گۆڵکه‌ری هه‌یه‌ ، پارێزه‌ر و هاوکاری هه‌یه‌ ئاواش ئه‌رکه‌کان له‌حیزبدا ماف و ئه‌رکی ئه‌ندامانی هه‌یه‌ . پرسێک له‌ تازه‌گه‌ری بۆ لێکۆڵینه‌وه‌ و به‌دواداچوون ئه‌گه‌ر پۆلێنی ئه‌ندامه‌کان وا پێناسه‌ بکرێ .. ( لایه‌نگر ، ئه‌ندامی کارگێڕی ، ئه‌ندامی چالاک ) زۆرینه‌ی سه‌رتاسه‌ری ڕێکخستن به‌لایه‌نگر بناسرێ و له‌پرۆسه‌کانی هه‌ڵبژاردن ئاماده‌ و کارای کایه‌کان بن . ئه‌ندامی کارگێڕی هه‌موو ئه‌و کادیرانه‌بن به‌ڕێوه‌به‌ری ده‌زگا و بازنه‌کانی ڕێکخستن ئیشوکاره‌کان ڕاپه‌ڕێنن . ئه‌ندامی چالاک ئه‌و کادیره‌ پێشکه‌وتوو سه‌رکرده‌ییانه‌ په‌روه‌رده‌ و ئاماده‌کراوانه‌بن خاوه‌نی بڕیار و ئاماده‌ی پێشڕه‌وایه‌تی بن .
سه‌رکرده‌ی سه‌رده‌م ..
سه‌رکرده‌ و جۆره‌کانی بۆ هه‌ر سه‌رده‌م و شوێنێک جیاوازیان هه‌یه‌ ، هه‌ڵبژاردن و گوڵبژێری پێویستیه‌ ، تا ئه‌وکاته‌ی تواناوپێدانی مابێ ده‌کرێ سودی لێوه‌رگیرێ به‌ڵام مه‌رج نی یه‌ ئه‌وه‌ی دوێنی سه‌رکرده‌بوو شیاوی ئه‌مڕۆ و سوارچاکی هه‌موو بواره‌کان بێ یا ئه‌وه‌ی ئه‌مڕۆ بۆ سبه‌ی ده‌سبدا ! خۆگونجان و له‌گه‌ڵ ڕۆیشتن شتێکه‌ داهێنان و به‌رهه‌م شتێکی تره‌ . ئه‌وه‌ی له‌خولێکی سه‌رکرده‌ییدا داهێنان و توانای ده‌رده‌خا گه‌ر به‌شداری ده‌یان خولی تر و به‌سه‌رکرده‌ هه‌ڵبژێردرێته‌وه‌ هه‌رهه‌مان توانایه‌ و شتێکی تر زیاد ناکا . بێگومان هیچ سه‌رکرده‌یه‌ک‌ ئاسان ده‌سبه‌رداری سه‌رکردایه‌تی و قه‌ڵه‌مڕه‌وی فه‌نتازیای پاوانداری مه‌مله‌که‌تی خه‌یاڵی نابێ به‌تایبه‌تیش سه‌رکرده‌ له‌شکریه‌کان به‌ڵام وه‌ستان ئه‌و خاڵه‌یه‌ ئه‌گه‌ر پێش گه‌یشتن پێ ی ئاماده‌یی بۆ نه‌کرێ ئه‌وا دواییه‌که‌ی مێژوو بێبه‌زه‌یی ته‌خت و تاراجی هه‌نجن هه‌نجن ده‌کا و خۆشی نه‌مر نابێ . بۆیه‌ هه‌ڵبژاردنی سه‌رکرده‌ و تاجی فه‌رمانده‌یی چه‌نده‌ی خۆشی یه‌ و سه‌روه‌ریه‌ ئاواش کاتی دابه‌زین و هاتنه‌وه‌ ڕیزی ئه‌ندامه‌تی ئه‌وپه‌ڕی شکۆمه‌ندی خودی سه‌رکرده‌که‌یه‌ له‌جیاتی هێنانه‌ خواره‌وه‌ی به‌هه‌ڵا و هۆیها شیاوتره‌ به‌چه‌پڵه‌ ‌و گوڵباران به‌ڕێزی بێ پایانه‌وه‌ له‌پله‌کانی شه‌ره‌فمه‌ندی هاوڕیز بکرێ . بێگومان سه‌رده‌م بیری نوێ و سه‌رکرده‌ی نوێ بۆحیزب دروست ده‌کا ، له‌ده‌روازه‌ی کۆنگره‌ی یه‌کێتی دا ده‌یان و سه‌دان ئه‌ندامی چالاک خۆیان پاڵاوتووه‌ هه‌ندێکیان کۆن و نوێخوازن هه‌ندێکیشیان نوێ و کۆنه‌خوازن پێچه‌وانه‌که‌شی هه‌ر ڕاسته‌ ، ده‌توانین به‌ده‌نگێکی بڵند بڵێین: له‌م هاوکێشه‌ هه‌ستیاره‌دا بڕیاری ئه‌ندامانی کۆنگره‌ جگه‌ له‌وه‌ی ئه‌رکێکی ڕێکخراوه‌یی یه‌ ، ویژدانی دادوه‌ر و کڕۆکی ڕه‌وشتی مرۆڤایه‌تی یه ‌. هه‌ڤاڵینه‌ تکایه‌ هۆشیاربن کورد ده‌ڵێ: " هه‌رچی سمێڵی سور بوو هه‌مزاغه ‌نی یه‌ " پێوه‌رتان هه‌بێ له‌به‌ره‌یه‌کی شه‌ڕدا هه‌زار کادیر قوربانی پێشمه‌رگه‌یه‌کی نه‌به‌ز ده‌بێ ، له‌کۆنگره‌یه‌کی حیزبی یا نێونه‌ته‌وه‌یی دا هه‌زار پێشمه‌رگه‌ قوربانی کادیرێکی سیاسی دبلۆماسی ده‌بێ ئه‌گه‌ر کادیره‌که‌ ته‌که‌تولبازێکی خۆپه‌رست نه‌بێ !
بانگه‌وازم له‌‌کۆنگره‌ ..
هه‌ڤاڵانی کۆنگره‌که‌ی یه‌کێتی نیشتمانیم ئێوه‌ن‌ نوێنه‌ری ویست و داهێنه‌ری کامه‌رانیم ، ئه‌رێ تۆ هه‌ڤاڵه‌که‌ی ڕێت لێگرتم منیش بێم دوای چه‌ندین ساڵ خه‌بات باجی ئه‌ندامه‌تی به‌سه‌ر سینه‌م هه‌ڵگرم .. قوڕگت گرتم نه‌تهێڵا ! خۆ ئێستا ناتوانی بیر و پێنوسه‌که‌م بخنکێنی به‌ده‌سته‌گه‌ری به‌بێ گه‌وزین له‌خوێنا مردارم که‌ی ڕۆحی ئازادیم ده‌ربهێنی ؟ په‌یامه‌که‌م هه‌رده‌گا له‌ده‌روازه‌ی کۆنگره‌ی یه‌کێتی دا له‌ده‌رگای ویژدانی هه‌ر تاکێکتان ده‌دا ، هۆ هه‌ڤاڵینه ..‌ ویستم بێم و له‌کاتی وه‌ستان بۆ گیانی پاکی شه‌هیدان ده‌نگ هه‌ڵبڕم هاوار بکه‌م : به‌خوێنی شه‌هیدان سوێندتان بده‌م ئێستا کاتی په‌یمانی ئاکاره‌ ، ده‌س له‌سه‌ر دڵ دانێن و به‌دوامدا هاوارکه‌ن بڵێن : ئه‌م په‌یمانی ئاکاره‌ ئه‌رێ په‌یمانی شه‌ره‌ف و دوابڕیاره‌ ، ئێستا کاتی یه‌کگرتنی ڕه‌وت و باڵ و کوتله‌ و ده‌سته‌گه‌ری بێ ئاماره‌ ! کات نه‌ماوه‌ به‌سه‌ جیایی خزم خزمێنه‌ و گه‌نده‌ڵی بێ کاره‌ . هه‌ڤاڵینه‌‌ ڕاچڵه‌کێن موچڕکێ بتان ته‌زێنێ خۆ ئه‌وه‌ هه‌ر ویستی من نی یه‌ به‌ڵکو ویستی چه‌نده‌ها لایه‌نگر و جیابۆوه‌ و ئه‌ندامی دڵسۆزی چاو له‌ده‌می ئێوه‌ی بێ چاره‌ . هه‌ڤاڵینه‌ دڵنیابن ئێستا دایکی‌ شه‌هید نزای سه‌رکه‌و‌تنتان بۆ ده‌کا ، له‌م ساته‌ وه‌ستانه‌ گیانی دکتۆر خالید و عه‌لی عه‌سکه‌ری و ئارام و ئازاد هه‌ورامی به‌سه‌ر سه‌رتانه‌وه‌یه‌ چاویان تیژه‌ ناختان ده‌خوێننه‌وه‌ ، په‌تی ملی شه‌هاب و جه‌عفه‌ر و ئه‌نوه‌ر مه‌دالیای زێڕه‌ ده‌دره‌وشێنه‌وه‌ ، شه‌وکه‌تی حاجی مشیر نه‌عره‌ته‌ی ئازایه‌تی پێشمه‌رگه‌تان به‌سه‌رده‌بارێنێ ، شه‌هید جه‌عفه‌ری حه‌مه‌ده‌روێش داوای ڕاستگۆییتان لێده‌کا و ده‌ڵی بۆ مانی یه‌کێتی له‌پارتیزانی دا چه‌ندین شه‌و بێ نان چاوم چۆته‌ خه‌و بێ سه‌رکرده‌ پۆلێ پارتیزانم بۆ سه‌رپه‌رشتی ‌کردن . شه‌هید سه‌رباز ده‌ست له‌گیرفانی ڕاده‌کا و مشتێ ورکه‌ نان ده‌ردێنێ و خۆی نایخوا ده‌یدا به‌مێرمنداڵترین پێشمه‌رگه‌ تا برسی نه‌بێ به‌هێز بمێنێ . ده‌ی ئێوه‌ش هه‌ر تۆزێ چاوهه‌ڵبڕن له‌ئاستی شه‌ماڵ و جه‌مالی عه‌لی باپیر و سه‌ید که‌ریم و هه‌موو شه‌هیدان شه‌رم نه‌تانگری ده‌س له‌گیرفانتان که‌ن له‌هه‌گبه‌ی باوه‌ڕه‌وه‌ نوقڵانه‌ی شیرینی جه‌ژنانه‌ بده‌نه‌ کوڕی شه‌هید و هه‌ڤاڵانی نائاماده‌ی کۆنگره‌ . هۆ هه‌ڤاڵینه‌ لێم تێبگه‌ن گه‌ر هه‌ڵۆبین به‌تاکه‌ باڵێک نافڕین ، خۆ گه‌ر تاکه‌چاوبین و هه‌ردووکیشی نابینا نه‌بێ هه‌ر پێمان ده‌ڵێن کوێره ‌جا ئه‌گه‌ر ده‌ستێکیشمان نه‌بێ هه‌ر‌ده‌ڵێن گۆجه‌ و گه‌ر به‌یه‌ک لینگیش بوه‌ستین دڵنیابن هه‌رپێمان ده‌ڵێن شه‌له‌ . که‌ دووچاومان هه‌یه‌ کوێرمان مه‌که‌ن ، که‌ دوو ده‌ستمان هه‌یه‌ گۆجمان مه‌که‌ن ، که‌ دوو پێمان هه‌یه‌ شه‌لمان مه‌که‌ن ، گه‌ر دوو باڵمان هه‌یه‌ بێ به‌رزه‌ فڕی تاقی ئاسمانمان مه‌که‌ن ! هه‌ر هه‌مووتان دواجار به‌گیانی لێبورده‌یی به‌رژه‌وه‌ندی هاوبه‌ش و دوژمنی هاوبه‌ش پێناسه‌بکه‌ن ڕه‌خنه‌ له‌تاک نه‌بێ سیسته‌می کار نۆژه‌ن بکه‌ن ته‌نیا و ته‌نیا ته‌که‌تولی یه‌کێتی بین . دیسانه‌وه‌ هه‌رهه‌مووتان ئه‌رک و مافی ئه‌ندامه‌تی فۆڕمات بکه‌ن ، سه‌رۆکمان ناوێ شه‌رمی لێ بکه‌ین لێ ی بترسین ، فه‌رمان بدا سه‌رمان نه‌وی ملکه‌چین ! هه‌ر سکرتێره‌ بۆمان که‌س و مامه‌ ، نوێنه‌ر و قسه‌خۆشی براده‌ر و دڵگه‌وره‌ی ڕه‌خنه‌ و پێشڕه‌وی شاسواره‌ ‌.
سه‌رکرده‌ و ئینته‌رنێت ..
په‌یوه‌ندی نێوان سه‌رکرده‌ و لایه‌نگر یا ئه‌ندامانی ئۆرگانه‌کانی خواره‌وه‌ شاڕه‌گی به‌رده‌وامی هه‌روه‌ها سه‌رکه‌وتنی حیزبه‌ . له‌سه‌ده‌ی بیستویه‌ک له‌ناو جه‌نجاڵ و ڕایه‌ڵه‌ی په‌یوه‌ندیه‌کاندا تیشکه‌نامه‌ی ئه‌لیکترۆنی ( ئیمێل ) ئه‌و دیارده‌ سیحر به‌زێنه‌یه‌ ناڕاسته‌وخۆ په‌یوه‌ندیه‌کان له‌چرکه‌ساتدا ده‌گه‌یه‌نێ و گرێبه‌ند ده‌کا ، ته‌کنه‌لۆجیا به‌گشتی و ‌ته‌له‌فۆنی ده‌ستی به‌کورته‌نامه‌ خێراکه‌ی هه‌مان خزمه‌تگوزاری ئه‌رک و مه‌به‌ست ده‌گه‌یه‌نن ، نابێ و ناشی سه‌رکرده‌کانی ئه‌م سه‌رده‌مه‌ به‌تایبه‌تی له‌ناو یه‌کێتیدا که‌ له‌م کۆنگره‌ نوێیه‌ هه‌ڵده‌بژێردرێن خوازیاری بوون به‌حیزبی دامه‌زراوه‌ییان هه‌یه‌ دابڕاوی ئینته‌رنێت یان بێ ئاگا و پشتگوێخه‌ری هه‌موو ئه‌و خزمه‌تگوزاریانه‌بن . بێتوو وه‌ک مێژوێکی نزیک ئاوڕ له‌سه‌رده‌می خه‌باتی شاخ بده‌ینه‌وه‌ سه‌ره‌ڕای دووری سه‌رکردایه‌تی و زه‌وه‌ندی گرفته‌کان به‌ڵام له‌ڕێگای ئامێره‌کانی ڕاکاڵ و ڕادیۆ په‌یوه‌ندی له‌گه‌ڵ ئۆرگانه‌کانی خواره‌وه‌ تا جه‌ماوه‌ر زۆر به‌هێز بوو که‌چی له‌م سه‌رده‌مه‌ی قۆناغی فه‌رمانڕه‌وایی ئه‌گه‌ری کزی په‌یوه‌ندیه‌کان وه‌ک دیارده‌یه‌کی به‌رچاو لاواز و بێ هێزه‌ ! نه‌خوێندنه‌وه‌ی ماڵپه‌ڕه‌ئه‌لکترۆنیه‌کان ئه‌وپه‌ڕی بێئاگایی له‌ڕاوبۆچوونی دوست و دوژمنانه‌ که‌ده‌کرێ هه‌نگاوی سیاسه‌تی ڕاست و سه‌رده‌میانه‌ی له‌سه‌ر هه‌ڵبهێندرێ ، ئه‌گه‌ر پاساو کێشه‌ی که‌مکاتی ، سه‌رقاڵی و پڕکاری بیانووبێ ئاسانه‌ ده‌توانن له‌ڕێگای سکرتاریه‌تی خۆیانه‌وه‌ په‌یوه‌ندیه‌کان وه‌ڵام بده‌نه‌وه‌ به‌ئاشکرا بواری په‌یوه‌ندیه‌کان چڕ و به‌هێز بکه‌ن که‌به‌قازانجی خۆیان و یه‌کێتیه‌که‌مان ته‌واو ده‌بێ به‌تایبه‌تیش تیشکه‌نامه‌کان ‌هۆکارێکی په‌یوه‌ندی شارستانی و ته‌ندروسته‌ .
دزه‌ی چوونه‌ کۆنگره‌ !
پڕۆسه‌ی هه‌ڵبژاردنی ئه‌ندامانی کۆنگره‌ی سێیه‌م له‌تۆڕ و فلته‌ره‌ به‌رته‌سکه‌کانی له‌قالب دان هه‌روه‌ها نه‌خوێندنه‌وه‌ی توانای ژماره‌یه‌کی زۆری ئه‌ندامه‌ جۆریه‌کان ده‌کرێ به‌هه‌ڵه‌یه‌کی سیسته‌ماتی و ئه‌نقه‌ست پێناسه‌بکرێ بۆ زیاتر قوڵبونه‌وه‌ی درزی دیارده‌ی ته‌که‌تول ، هاندان بۆ باڵ باڵێن و په‌راوێزکردنی ئه‌ندامه‌ ته‌نیا یه‌کێتی یه‌کان به‌ڵام ئه‌وه‌ی له‌هه‌مووی بریندارکه‌رتربوو د‌زه‌ی چوون یا به‌شداری هه‌ندێ له‌و هه‌ڤاڵانه‌یه‌ له‌م ڕۆژانه‌ی دوای هه‌ڵبژاردنه‌کان له‌هه‌نده‌رانه‌وه‌ به‌پێ ی ناسین و دڵنه‌وایی ، هۆکاری بێ هێز و هه‌ڵخه‌ڵه‌تێنه‌ر ، بازدان به‌سه‌ر مافی گشتی و بێدادی ، ڕاده‌ی توانا و دڵسۆزی ... دیارده‌یه‌کی ڕوونی نه‌شاراوه‌ی گوماناوی بۆ که‌سانی خاوه‌ن ئینتما بۆ یه‌کێتی بوو ! به‌داخه‌وه‌ هیچ پاکانه‌یه‌ک دادی نادا ، هیچ یاسایه‌کیش پشتڕاستی ناکاته‌وه‌ . ئێمه‌ی‌ په‌روه‌رده‌ی ڕێکخستنه‌کانی یه‌کێتی هه‌ر خۆیان فێری ئازایه‌تی ڕاده‌بڕین ، لێکدانه‌وه‌ی زانستی ، چاونه‌ترسی ، دانه‌پۆشینی هه‌ڵه‌کان ... له‌قوتابخانه‌یه‌کی شۆڕشگێڕی په‌روه‌رده‌یان کردین بێگومان ئێستاش هه‌ر به‌وگیانه‌ پێشمه‌رگه‌ ڕه‌وشتییه‌وه‌ کارده‌که‌ین و په‌رده‌ له‌سه‌ر ناڕه‌واییه‌کان هه‌ڵده‌ماڵین ! پرسه‌که‌ ئه‌وه‌یه‌: ئایا چ پێوه‌رێکی سیاسی ، دیموکراسی ، یایاسای هه‌ڵبژاردن ... تاد. ڕێگه‌ به‌و شێوازه‌ به‌شداریه‌ ده‌دا ؟ ئێمه‌ ناوزڕێنه‌ری هیچ هه‌ڤاڵێک نین و مافی به‌شداری له‌بڕیاره‌کانی ناو یه‌کێتی له‌که‌س زه‌وت ناکه‌ین به‌ڵام خۆزگه‌ و چه‌ندین جاری تریش خۆزگه‌ به‌و هه‌ناسه‌ ساردیه‌ هه‌ڵسوکه‌وتیان له‌گه‌ڵ نه‌کردباین ! گیانی به‌رپرسی هه‌ر تۆزێک زاڵ بووایه‌ !

دڵشاد تاقانه‌

Dlshadtakana@yahoo.com