|
هه‌ڵوێستنامه‌یه‌ك له په‌راوێزی تیرۆركردنی
خوێندكار و ڕۆژنامه‌نووسی (سه‌رده‌شت عوسمان)
وه‌ك هه‌موو لایه‌ك ئاگاداره، له ماوه‌ی
ڕابردوودا، له شاری هه‌ولێر، چه‌قی پایته‌ختی هه‌رێمی
كوردستان، له‌لایه‌ن چه‌ند كه‌سێكی نه‌ناسراوه‌وه
خوێندكاری زانكۆ و ڕۆژنامه‌نووسی قه‌ڵه‌م زیندوو
كاكه (سه‌رده‌شت) دوای ڕفاندنی و سه‌رنگومكردنی
بۆ ماوه‌ی چه‌ند ڕۆژێك، دواتر هه‌واڵی دۆزینه‌وه‌ی
جه‌سته‌ی به غه‌در شه‌هیدكراوی له شاری (موصڵ)،
له‌لایه‌ن ده‌زگا ئه‌منییه‌كان و كه‌ناڵه‌كانی
ڕاگه‌یاندنه‌وه بڵاوكرایه‌وه.
به ئه‌نجامدانی ئه‌و كرده‌وه قێزه‌وه‌نه،
جارێكی تر تیرۆریستان مه‌رامی گڵاوی خۆیان دووپات
كرده‌وه، به‌وه‌ی ئه‌وان هێشتا له بۆسه‌دان به‌رامبه‌ر
به ده‌نگی گه‌نج و ده‌نگی ئازادیخوازان و لێناگه‌ڕێن
ژیانی بێترس و تۆقاندن له‌م هه‌رێمه‌دا به‌یه‌كجاریی
بچه‌سپێ. ئه‌مه‌ش له‌كاتێكدایه، كه ئێمه له
ڕوانگه‌ی سه‌رنجدانمان به‌وه‌ی هێشتا له
كوردستانی ئازاد و له‌سایه‌ی حكومه‌تی خۆماڵیدا
خۆماندا، ئه‌هلی قه‌ڵه‌م و به‌تایبه‌تی ڕۆژنامه‌نووسان،
به هۆی جیاجیا و له‌كاتی جیاجیادا، دووچاری مه‌ترسی
جه‌سته‌یی و ده‌روونی ده‌بنه‌وه، له‌وه‌ش بترازێ
دووچاری ڕفاندن و ئه‌شكه‌نجه‌دان و كوشتنیش ده‌بنه‌وه،
دیاره ئه‌مه‌ش ته‌نهاو ته‌نها له‌پێناو خامۆشكردن
و ڕێگرتنه له ئازادیی ڕاده‌ربڕین و بڵاوكردنه‌وه،
كه هه‌ڵبه‌ت هه‌موو لایه‌ك ده‌زانن، له‌وه‌ی
ئازادیی ڕاده‌ربڕین سه‌ره‌تاییترین مافه‌كانی
مرۆڤه‌و دیاره هه‌ركه‌سیش بیه‌وێ كۆسپ و له‌مپه‌ر
له‌و ڕێگایه‌دا دابنێ، هه‌روا و به ئاسانی له
حوكمی سه‌ختی مێژوو ده‌ربازی نابێ، چونكه ئه‌و
جۆره ڕه‌فتاره نامرۆییانه، دواجار ده‌چێته
قاوخی دژایه‌تیكردنی بیری ئازادیخوازانه‌ی یه‌كبه‌یه‌كی
تاكه‌كانی كۆمه‌ڵگه.
لێره‌وه داوا ده‌كه‌ین، كه سه‌رجه‌م خوێندكارانی
سه‌رگه‌ڤاز و بوێر، ده‌نگیان بخه‌نه پاڵ ده‌نگمان
و داوایان له‌گه‌ڵ داواماندا یه‌ك بخه‌ن، بۆ ئه‌وه‌ی
هه‌رچی زووه، لایه‌نه په‌یوه‌ندیداره‌كان و به‌تایبه‌تی
ده‌زگاكانی پۆلیس و ئاسایشی ناوخۆی هه‌رێم، به
جیدی بكه‌ونه خۆ، بۆ دۆزینه‌وه‌و ده‌ستگیركردنی
تاوانباران و بكوژانی خوێندكاری شه‌هید كاكه (سه‌رده‌شت)و
هه‌موو ئه‌وانه‌ی ده‌ستیان له پشته‌وه‌ی وه‌ها
كرده‌وه‌یه‌كی قێزه‌وه‌نه‌وه هه‌یه و ڕه‌وانه‌ی
به‌رده‌م دادگا بكرێن، چونكه ئه‌و ڕووداوه
ویژدانی هه‌ستیارترین توێژی ئه‌م كۆمه‌ڵگایه‌ی
بریندار كرد، كه ئه‌ویش توێژی خوێندكارانه‌و
بڕبڕه پشتی ئاینده‌ی ئه‌م وڵاته‌ن.
له كۆتاییدا، ده‌ڵێین: به تیرۆركردنی كاكه (سه‌رده‌شت)ی
هاوڕێمان، ده‌نگی گڕی خوێندكاران و ڕۆژنامه‌نووسانی
بوێر و ئازادیخوازی كورد، هه‌رگیزاو هه‌رگیز
ناكوژێته‌وه‌و خامۆش نابێ.
نــا بۆ تیرۆر و تۆقاندن..
به‌ڵێ بۆ ئازادیی ڕاده‌ربڕین و به‌ڵی بۆ پاراستنی
گیانی خوێندكاران و ڕۆژنامه‌نووسان..
كۆمه‌ڵێك خوێندكاری
كۆلێژی په‌روه‌رده‌ی بنه‌ڕه‌تی كه‌لار
11/5/2010
|