لە ساڵی 2006 بەدواوە، ساڵی خۆپێشاندانی زۆرێک لە شار و شارۆچکەکانی کوردستان دژی گەندەڵی، دژی نەبونی خزمەتگوزاریە کۆمەڵایەتیەکان و پێداویستیە سەرەتاییەکانی ژیان،... بەڵێ لەو ساڵە بەدواوە، ڕەوەندی ڕوو وەرچەرخان و ڕەخنەگری بەشێکی بەرفراوان لە نوسەران و ڕۆشنبیرانی کوردستان، سەری هەڵداوە دژی دەسەڵاتی هەردوو حیزبی فەرمانڕەوا؛ "پارتی" و "یەکیەتی" لە حکومەتی هەرێمی کوردستاندا.
گەرچی ناوەڕۆک و ڕوانگەی ئەو ڕوو وەرچەرخانە و ئەم ڕەخنەگریە دژی گەندەڵی و دەست بەسەراگرتن و هەتا دزی و فزی بێ پەردەی سەروەت و سامانی گشتی کۆمەڵگە لەلایەن بەرپرسان، کاربەدەستان و لێپرسراوانی حیزبی و حکومیەوە، لە ناوەڕۆک و ڕوانگەیەکی ڕەخنە گرانەی لیبرالانە و دیموکراتخوازانە تێپەڕی نەکردوە، بەڵام نەک هەر ڕەخنەی ڕادیکاڵی چەپ، کرێکار و کۆمۆنیزم بەڵكو هەتا ئەم ڕەخنە لیبرال و دیموکراتخوازانەیەش لە توانای تەحەمول کردنی سەران، لێپرسراوان، بەرپرسان و کاربەدەستانێکی کوردستاندا نەبوە کە تازە کەوتون بەسەر سفرەی نازونیعمەتدا و بێ ئەزمون نوێنەرایەتی سەرمایە و سەرمایەدارانی کوردستان دەکەن.
هەربۆیە چوار ساڵی ڕابردوو، چوار ساڵی هەنگاو بە هەنگاو کۆنتڕۆڵ کردنی ئەو فەزا ئاوەڵا فکری و سیاسیەی کوردستان بوە کە بەهۆی ئاڵوگۆڕێکی سەراسەری لە عێراقدا هاتبۆ ئاراوە. چوار ساڵی رابردوو، چوار ساڵی پێ بەپێ بەرتەسک کردنەوە و لەقاڵبدانی ئازادی بیروڕا دەربڕین بوە لە چوارچێوەی یاسای ڕۆژنامەگەری کوردستان و دەستورێکی کۆنەپەرستانەدا لەژێر ناوی پیرۆزیە نەتەوەیی و ئایینیەکان، نەک هەر چوار ساڵی ڕێگری لە ڕوماڵکردن و بە دواداچونی هەواڵ و کارەکانی دەزگا حیزبی وحکومیەکانی هەرێم بوە، بەڵکو چوار ساڵی سوکایەتی پێکردن، هەڕەشە لێکردن، کامێرا شکاندن، فڕاندن، کوتەک کاری و ترۆری ڕۆژنامە نوسانیش بوە لە کوردستاندا.
هەر ئەوە کە لە ساڵی ڕابردودا زیاتر لە 350 پێشێلکاری و دەست درێژی تۆمارکراوە بۆسەر ڕۆژنامە نوسان لەلایەن ڕێکخراوێکی ژێر سێبەری ئەم دەسەڵاتەی وەک "سەندیکای ڕۆژنامە نوسانی کوردستان"، دەربڕی ئەو ڕاستیەی سەرەوەیە. ترۆری سەردەشت عوسمان لەبەردەوامی ئەو پڕۆسەیەدایە و بەشێکە لەو سیناریۆیە، کە هێشتا زۆرێکیشی لێ تۆمار نەکراوە.
ئەوەی کە ئەم ترۆرە لە دەست درێژی و ترۆرەکانی پێشوتر جیادەکاتەوە ئەوەیە کە بە ڕۆژی ڕوناک لەبەردەم کۆلێژی ئاداب لە زانکۆی هەولێر لە 4 ی مانگی ئایاردا، سەردەشت عوسمان پەلامار دەدرێت، دەخرێتە ناو سەیارەیەکەوە و دەفڕێندرێت و دوای دوو ڕۆژ لە 6 ی مانگدا تەرمەکەی لە شاری موسڵ دەدۆزرێتەوە. وەک بڵێی حیزبی خاوەن دەسەڵات و فەرمانڕەوای شار گەشتبێتە جێگەوڕێگە و سەر سەکۆیەکی بەرزی وەها کە ئیتر هەروەک ڕژێمی بەعس چاونەترس و بێباک، بیەوێت بە دەزگای سەرکوتگەری "پاراستن" بکەوێتە قەلاچۆکردنی هەموو دەنگێکی ناڕازی و ئازادیخواز.
بێشک ترۆری سەردەشت عوسمان زەنگێکی خەتەرناکە بۆ سەرجەم کۆمەڵگەی کوردستان و هاوکاتیشە لەگەڵ بانگەشەی ڕەوتەکانی ئیسلامی سیاسی و فتوای مەلای مزگەوتەکان، بە دژی هەندێ لە نوسەران و مەڵبەندە ڕۆشنبیریەکان لە ئێستادا، بە ناوی پێشێل کردنی پیرۆزیەکانی ئسلام. گەرچی ترۆری سەردەشت عوسمان و فتوای ئیسلامی سیاسی دژی نوسەران و مەڵبەندە ڕۆشنبیریەکان لەلایەن دوو هێزی سیاسی جیاواز، بۆ ئامانجی جیاواز و بەشێوازی جیاوازەوە ئەنجام دەدرێن بەڵام لە ناوەڕۆکدا هاوبەشن؛ کە ئەویش پەرەپێدانی فەزای ترس، دەم کوتکردنی هەر دەنگێکی ناڕازی، زاڵ کردنی کۆنەپەرستیەتی فکری، داسەپاندنی ئیستیبدادی بورژوازی و هەڵپێچانی ئەو فەزا نیمچە ئاوەڵا فکری و سیاسیەیە کە لەو دەرفەتە مێژووییەدا لە کوردستاندا هاتۆتە ئاراوە.
ڕوو وەرگێران و ڕەخنەی ڕۆشنبیران و نوسەرانی ئازادیخواز، لیبرال و دیموکراتیخواز، گەرچی پەرەی داوە بە ڕەوینەوەی خۆشباوەڕی کرێکاران و زەحمەتکێشانی کوردستان بە دەسەڵاتی بورژوازی، حیزبی و میلیشیایی خۆماڵی، بەڵام لە هەمان کاتدا "ترۆری" شەخسیەتی سیاسی سەربەخۆی ئەوانیشی کردوە و کردونیەتە دەستمایەی ڕەوت و دەستە و تاقمی تری بورژوازی لە مامەڵەی نێوان خۆیاندا. ئەوەی کە لە ساڵی 2006 بەدواوە لە کوردستاندا دەگوزەرێت؛ پڕۆسەیەکی یەکلایەنەی "ترۆری شەخسی" ڕۆشنبیران و "ترۆری قەڵەمی" نوسەرانی کوردستان نیە بە تەنها، بەڵکو پڕۆسەیەکی دولایەنەیە و "ترۆری شەخسیەتی سیاسی" جەماوەررەی کرێکار و زەحمەتکێشی کوردستانیشی گرتۆتە خۆ و لەم ڕێگەیەوە ناڕەزایەتیەکانی ئەم جەماوەرەی کردۆتە پاشکۆی ئاڵتەرناتیڤ و ڕەوتی ناسیونال-لیبرالی "لیستی گۆڕان" و بە دەوری ئەودا تەوەرەی پێ بەستوە.
لەبەرامبەر ترۆری قەڵەم و ترۆری شەخسی نوسەراندا، وێڕای ڕێکخراوبونی نوسه‌ران و رۆژنامه‌نوسانی کوردستان له‌ ڕێکخراوه‌ و سه‌ندیکای پیشه‌یی سه‌ربه‌خۆی خۆیاندا لەدەرەوەی سەندیکا زەردەکانی سەر بە حیزبە دەسەڵاتدارەکانی کوردستان؛ بەڵێ وێڕای ئەوە، ئەمە هێنانە مەیدانی کرێکاران و زەحمەتکێشانە بەڕێزی سەربەخۆی سیاسیانەوە کە زەمانەتی داسەپاندنی یاسایه‌کی مۆدێرن، هاوچه‌رخ و ئازادیخواز دەکات له‌ بواری میدیاگه‌ری و چاپه‌مه‌نیدا به‌سه‌ر حکومه‌تی هه‌رێمدا، که‌ ئازادی ڕێکخراو بون و ئازادی بیروڕا ده‌ربڕین دابین بکات و بەر بەترۆری قەڵەم و ترۆری نوسەران بگرێت.
"ڕەوەند" ی سۆشیالیستی کرێکاری وێڕای پرسە و هاوغەمی کردنی بنەماڵە و کەسوکاری جوانەمەرگ سەردەشت عوسمان، هەروەها برادەران و هاوکارانی هاوپیشەی ئەو، بەدواداچونی ئەم تاوانە و ئاشکرا کردنی ئەنجامدەرانی وەک ئەرکێکی دەست بەجێی سەرشانی حکومەتی هەرێم و لایەنە بەرپرسەکان دادەنێت.
- نەنگ و شەرمەزاری بۆ ترۆر
- بژی ئازادی بێ قەید و شەرتی فکری و سیاسی
ڕەوەندی سۆشیالیستی کرێکاری
www.rewend.info
7-5-2010