ئه‌گه‌رچی ده‌یان ساڵه‌ نووسه‌ران ورۆشنبیرانی كوردستان له‌دۆخێكی ناله‌بارو پڕ له‌مه‌ترسی هه‌ڕه‌شه‌ی تیرۆستانه‌ و كۆنه‌په‌رستانی تاریكی له‌ عێراق و ده‌وروبه‌ر ژیان ده‌گوزه‌رێن و هه‌رجاره‌ی به‌شێوه‌یه‌ك له‌شێوه‌كان كۆنه‌په‌رستان هه‌ڕه‌شه‌ی ده‌مكووتكردن و ته‌كفیركردن ده‌خه‌نه‌ پاڵ نووسه‌ران و ده‌یانه‌وێ كوردستان بگه‌ڕێننه‌وه‌ دۆخی تاریكی و ئازادی راده‌ربڕین به‌تیرۆری فیكریی و تۆقاندن و كوشتنی رۆحی جیاوازیه‌كان بخه‌نه‌ سه‌به‌ته‌ی كۆنه‌په‌رست و بیرته‌سكه‌كانه‌وه‌ ، ئێمه‌ وه‌ك رۆشنبیرانی كه‌ركوك ئه‌م بیرته‌سكیه‌یه‌ی كۆنه‌په‌رستانمان به‌هه‌ند وه‌رنه‌گرت و هه‌رهێنده‌مان له‌و عه‌قڵانه‌ چاوه‌ڕوان ده‌كرد ، ئه‌وه‌ی به‌لای ئێمه‌ نائاساییه‌ له‌دۆخێكی له‌باری ئه‌منی له‌كوردستان ئازادی رادربڕین رۆژبه‌رۆژ به‌رته‌سك ده‌بێته‌وه‌و بكوژان به‌رۆژی نیوه‌ڕۆ و به‌به‌رچاوی هاوڵاتیانه‌وه‌ سوكایه‌تی به‌نووسه‌ران و رۆشنبیرانه‌وه‌ ده‌كه‌ن ، به‌داخه‌وه‌ ده‌ستی ره‌شی ناحه‌زانی ئازادی راده‌ربڕین گه‌یشته‌ ئه‌وه‌ی هیچ حیسابێك بۆ ئینسانبوون نه‌هێڵێته‌وه‌ و حورمه‌تی زانست و یاسا بخه‌نه‌ سه‌روو حیساباتی عه‌قلییه‌تی شه‌ڕانگێزی خۆیانه‌وه‌ ، به‌داخه‌وه‌ رۆژی 4\5 2010 له‌به‌رده‌م كۆلیجی زمانه‌وانی زانكۆی سه‌لاحه‌دین كۆمه‌ڵێك چه‌كدار به‌به‌رچاوی خوێندكارانه‌وه‌ ، خوێندكار و رۆژنامه‌نووس سه‌رده‌شت عوسمانیان رفاند و دوای دوو رۆژ له‌رفاندنی ته‌رمه‌كه‌ی له‌یه‌كێك له‌گه‌ڕه‌كه‌كانی شاری موسڵ دۆزرایه‌وه‌ ، له‌كاتێكدا تیرۆركردنی سه‌رده‌شت عوسمان له‌پایته‌ختی هه‌رێمی كوردستان بۆخۆی ئه‌وپه‌ڕی سووكایه‌تیه‌ بۆ حكومه‌تی هه‌رێمی كوردستان له‌هه‌مان كاتدا گورزێكی گورچكبڕه‌ له‌هێزه‌ ئه‌منییه‌كانی شاری هه‌ولێر ، تیرۆركردنی سه‌رده‌شت ، تیرۆركردنی هه‌موو نووسه‌ران و خه‌ڵكی هه‌ولێریشه‌ به‌گشتی ، ئێمه‌ وه‌ك كۆمه‌ڵێك له‌نووسه‌رانی شاری كه‌ركوك داوا له‌سه‌رۆكی هه‌رێمی كوردستان و سه‌رۆكی حكومه‌تی هه‌رێمی كوردستان و سه‌رۆك كۆمارده‌كه‌ین زۆر به‌زووی هه‌وڵی خۆیان بخه‌نه‌گه‌ڕ بۆ بنبڕكردنی تیرۆری فیكری و تیرۆركردنی نووسه‌ران و رۆژنامه‌نووسانی كوردستان ، ئه‌وه‌ی له‌م دۆخه‌دا نووسه‌ران و رۆژنامه‌نووسانی كوردستانی پێاتێده‌په‌ڕێ به‌ر له‌هه‌ركه‌س و لایه‌نێك ئه‌زموونی كوردستانی پێ له‌كه‌دار و ناشرین ده‌بێت و دۆخی كوردستان هێنده‌ی تر ده‌خاته‌ مه‌ترسی و ئه‌و ئه‌زموونه‌ی به‌ناوی دیموكراسییه‌وه‌ ده‌خاته‌ به‌رده‌م پرسیاری مه‌ترسیداره‌وه‌ ، تیرۆركردنی سه‌رده‌شت عوسمان درێژكراوه‌ی تیرۆكردنی سۆرانی مامه‌حه‌مه‌ و عبالستارتاهیر شه‌ریفه‌ ، ئێمه‌ وه‌ك نووسه‌ران و رۆژنامه‌نووسانی كه‌ركوك به‌توندی ئیدانه‌ی ئه‌م كاره‌ قێزه‌ونه‌ ده‌كه‌ین و داوا له‌لایه‌نه‌ په‌یوه‌ندیداره‌كان ده‌كه‌ین په‌له‌ به‌كه‌ن له‌راگرتنی خۆێنی رۆژنامه‌نووسان و رۆشنبیرانی كوردستان و تاواباران ئاشكرابكه‌ن ، ئه‌م دۆخه‌ پڕمه‌ترسییه‌ی رۆشنبیرانی كوردستانی پیاپێپه‌ڕده‌بێ به‌داخه‌وه‌ خه‌ریكه‌ رۆژبه‌رۆژ ده‌بێته‌ دیارده‌یه‌ك ئه‌زموونی دیموكراسی به‌ره‌و ترسناكترین دۆخ په‌لكێش ده‌كات و هیچ به‌هایه‌ك بۆ ئینسانبوون ناهێڵرێته‌وه‌ .


1_ له‌تیف فتیح فه‌ره‌ج
2- داناعه‌سكه‌ر
3- عوسمان عه‌سكه‌ری
4- معتصم نجم الدین
5 مه‌لافه‌رمان
6- رابه‌ر ره‌شید
7- فرمێسك خدر
8-سه‌راب