|
له‌نێو
هاوکێشه سیاسی و کێشمه‌کێشه کۆمه‌ڵایه‌تیه‌کانی دنیای
ئه‌مڕۆدا لاوان وه‌ک توێژکی چالاک و به‌رجه‌سته ده‌رکه‌وتوون
، جێگاو ڕێگای لاوان له بزواندنی بزووتنه‌وه جه‌ماوه‌ریه‌کان
و ڕێکخستنی خه‌ڵک له‌ده‌وری داواکاری و خواسته‌کانیان
مه‌وقعیه‌تێکی چاره‌نووسازی داوه‌ته ده‌ست لاوان ، له‌زۆرێک
له ووڵاته گه‌وره‌کانی دنیا لاوان توانیویانه مۆری به‌شداری
خۆیان بده‌ن له نێو چه‌وانی ئه‌و هاوکێشه سیاسیانه‌ی
له‌کۆمه‌ڵگاکه‌یاندا ڕووده‌ده‌ن،ئێران و کۆریا دوونموونه‌ی
زیندووی ڕووبه‌ڕوبونه‌وه‌ی لاوان و ده‌سه‌ڵاتن بۆ
به‌ده‌ستهینانی ژیانێکی باشترو ئازاد و ڕیفاهی ، ئه‌وه‌ی لاوان
ده‌کاته سه‌نته‌رو پێشڕه و ڕابه‌ری ناڕه‌زایه‌تیه‌کان دوو
هۆکاری گرنگن ، یه‌که‌م : لاوان تواناو هێزێکی گه‌وره‌یان
هه‌یه بۆ نمایش کردنی خه‌لاقیه‌ت و داهێنانێک که ده‌توانن
خزمه‌تی کۆمه‌ڵگای پێبکه‌ن و ئاواته‌کانی خۆشیان بکه‌ن
به‌واقیع ، دووه‌م : سه‌رکووت و مه‌حروم کردنیان له ژیان و
چاره‌نووسێکی ئینسانی که شایسته‌ی خۆیان و کۆمه‌ڵگاکه‌یان بێت
،بۆیه ئه‌م دوو هۆکاره ڕاسته‌خۆ لاوان ده‌خاته به‌رده‌م
به‌رپرسیاریه‌تیه‌کی کۆمه‌ڵایه‌تی و ده‌بنه بڕبڕه پشتی هه‌ر
ئاڵوگۆڕێک که ڕووده‌دات ، لاوانی هه‌ڵه‌بجه‌ش به‌شێکی
دانه‌بڕاوی ئه‌و بزووتنه‌وه سه‌راسه‌ری و جه‌ماوه‌ریه‌ن که بۆ
ژیانێکی هاوچه‌رخ و پڕاوپڕ شایسته به‌خۆیان، هه‌میشه
به‌شێوه‌ی جۆراو جۆر ناڕه‌زایه‌تی ده‌رده‌بڕن و ده‌ورو نه‌خشی
خۆیان له‌سه‌ر کۆمه‌ڵگاکه‌یان به‌رجه‌سته ده‌که‌نه‌وه
،لاوانی هه‌ڵه‌بجه‌ش وه‌ک لاوانی هه‌موو دنیا حه‌زیان
به‌پێشکه‌وتن و ده‌ستڕاگه‌شتنه به ته‌واوی ئه‌و
ده‌سکه‌وتانه‌ی زانست و ته‌کنه‌لۆژیای سه‌رده‌م پێیگه‌شتووه ،
به‌ڵام به‌داخه‌وه حه‌زو ئاره‌زوه‌کانی لاوانی هه‌ڵه‌بجه
شتێکه‌و بێده‌ربه‌ستی ده‌سه‌ڵات و وه‌ڵام نه‌دانه‌وه
به‌خواسته سه‌ره‌تایی و ئینسانیه‌کانیان شتێکی تر ، لاوانی
هه‌ڵه‌بجه خوێندنگای پڕ له‌زانست و هۆکانی فێربوونیان
ده‌وێت
، لاوانی هه‌ڵه‌بجه کتێبخانه‌ی ده‌وڵه‌مه‌ندو تێروته‌سه‌لیان
ده‌وێت له فکرو مه‌عریفه‌ی سه‌رده‌م ، لاوانی هه‌ڵه‌بجه
سه‌نته‌ری لێکۆڵینه‌وه ، ڕۆشنبیری ، وه‌رزشی ، هونه‌ری و
داموده‌زگای خزمه‌تگوزاریان ده‌وێت ، ته‌نها به‌گوێ گرتن له
سکاڵاو ده‌ربڕینی خه‌مه‌کانی ناخی چه‌‌ند لاوێکی هه‌ڵه‌بجه ،
بۆت ده‌رده‌که‌وێت که لاوانی ئه‌م شاره چه‌نده مه‌حروم و
چه‌نده بێبه‌ش کراون له‌حه‌زو ئاره‌زوه‌کانیان ،
له‌ڕیپۆرتاژێکی که‌ناڵی زاگرۆز گوێم له لاوێک بوو ده‌یووت
شه‌قاماکانمان بۆ قیرتاو بکه‌ن چونکه ته‌نها شه‌قامه‌کان شک
ده‌به‌ین بۆ به‌سه‌ر بردنی کاته‌کانمان ، لاوێکی تر ووتی
ئه‌بێت به‌جلی ماڵه‌وه بێینه ده‌ره‌وه چونکه کۆڵانه‌کان
ئه‌وه‌نده قوڕو چڵپاوه ناتوانین خۆمان بگۆڕین ، ته‌نها
سه‌رنجدان له‌م دوو ڕسته‌یه ئاستی نه‌بوونی خزمه‌تگوزاری له‌م
شاره‌و بێبه‌ش بوونی لاوه‌کانی زۆر بێپه‌رده ده‌رده‌که‌وێت ،
له‌هه‌موو دنیا شه‌قام و جاده‌کان بۆ به‌ستنه‌وه‌ی کۆڵان و
گه‌ڕه‌ک و بازاڕو هه‌موو شاره پێکه‌وه ، به‌ڵام بۆ لاوانی
هه‌ڵه‌بجه بۆته جێگای به‌سه‌ر بردنی کاته‌کانیان و ته‌نانه‌ت
ئه‌وه‌ش به‌دڵی خۆیان نییه ، لاوانی هه‌ڵه‌بجه به‌هۆی دڵه
پڕ له‌هیواکانیان و خواسته قه‌تیس کراوه‌کانیان به‌رده‌وام
ڕۆڵی به‌رچاویان هه‌بووه له ناڕه‌زایه‌تی کردن و ڕێکخستنی
جه‌ماوه‌ر بۆ به‌ده‌ستهێنانی مافه‌کانیان ، ئه‌مساڵیش وه‌ک
هه‌موو ساڵه‌کانی تر له‌یادی نۆزده‌هه‌مین ساڵرۆژی
کیمیابارانکردنی شاری هه‌ڵه‌بجه‌دا لاوان ئه‌رک و
به‌رپرسیاریه‌تیه‌کی گه‌وره‌ی کۆمه‌ڵایه‌تی و ئینسانیان
ده‌که‌ویته ئه‌ستۆ بۆ به‌رگری کردن له خه‌ڵکی به‌شخوراوی
هه‌ڵه‌بجه ، لاوانی هه‌ڵه‌بجه نابێت به‌وه‌عده‌و به‌ڵێنی
ده‌سه‌ڵاتداران چاوبه‌ستبن و داخوازیه‌کانیان بسپێرن
به‌فایلێکی له‌بیرکراوی بنده‌ستی به‌رپرسان، لاوانی هه‌ڵه‌بجه
شایسته‌ی جوانترین و شیاو ترین ژیانن به‌خۆیان و هیچیان که‌متر
نییه له لاوانی دنیا .
|