|
هێواش.. هێواش به پلیكانه‌كاندا سه‌ركه‌وتم، قاچه‌كانم خێرا
خێرا داده‌نا و سست سست به‌رزم ده‌كرده‌وه، ته‌پ ..ته‌پ
..ته‌پ ته‌پ ته‌پ..ت ه پ ..ت ه..ت.. ده‌نگی پێم ڕیتمێكی
نامۆ نه‌بوو به من، خاو ده‌ستم پێده‌كرد و خێرا ده‌بووم و خاو
ده‌بوومه‌وه و كۆڵم ئه‌دا، نا كۆڵم نه‌ئه‌یا، سه‌رله‌نوێ
ده‌ستم پێده‌كرده‌وه، دره‌نگانی شه‌وێك كه ئه‌م ڕاستییه‌ی
ژیانی خۆم بۆ ئه‌و كچه‌ی مشته‌رییه‌كان پێیان ده‌ووت (توێخی
دڵده‌بات) باسكرد، خۆی گرمۆڵه كرده ژێر به‌تانییه‌كه و
چاوه ڕه‌شه‌كانی، كه هێشتا لیڵ بوو، بڕیه ناو خاڵی
به‌یه‌كگه‌یشتنی هه‌ردوو برۆ تۆخه‌كه‌م و به‌ده‌نگێك كه من
گومانم هه‌یه ئه‌گه‌ر
لێویشی نه‌جوڵاندایه ئه‌و ده‌نگه له ژێكانی قوڕگییه‌وه
به‌ئاسانی ده‌گه‌یشته من وتی "كه سه‌یریت...! ئه‌گه‌ر ژیانی
تۆ پێناسه بكه‌م سێكسێكی ته‌واویت"، ڕاستی كرد، منیش جارێكی
تر ژیانی خۆم بۆ هیچ كه‌سێك نه‌گێڕایه‌وه، ئاخر بۆ
هه‌ركه‌سێكم بگێڕابایه‌وه له‌و باشتری نه‌ده‌پێكا، من جاران
وام ده‌گوت، كه‌چی ئێستا ده‌مه‌وێت جارێكی تر ژیانی خۆم
بنووسمه‌وه، خه‌ڵك ئه‌گه‌ر وه‌كو ئه‌ویش بۆی نه‌چن خۆ هه‌ر
ڕایه‌كیان ده‌بێت.
من بۆ له‌سه‌ر كه‌شتی خه‌یاڵی سۆزانیه‌ك له‌م لێڵاوه
دانابه‌زم، نازانم! به‌ڵام دڵنیام خۆم چیرۆكی خۆم له‌هه‌ر
كه‌سێكی تر باشتر ده‌گێڕمه‌وه، هه‌موو ئه‌وانه‌ی ویستوویانه
ڕۆژێك له‌ڕۆژان ژیانی من بنووسنه‌وه سه‌ره‌داوی
ڕاستیه‌كه‌یان لێ ون بووه و من بومه‌ته قوربانی فه‌زای
ده‌ق وتێكه‌ڵ بووم به‌فه‌نتازیایه‌ك و گۆڕاوم به كه‌سێك
هه‌موو كه‌سێك بم خۆم نه‌بێت، كه خۆم ئه‌وانه ده‌خوێنمه‌وه
ده‌ڵێم ئه‌مانه چیرۆكی من نین ڕه‌نگه چیرۆكی ژیانی
كه‌سێكی دی بن.
كێلونی درگاكه بۆخواره‌وه پاڵده‌نێم و كلیله‌كه له‌ناویا
هه‌ڵئه‌سوڕێنم به‌ڕاست، به‌چه‌پ، به‌ڕا..... هه‌میشه من كلیل
له‌ناو كێلونی درگادا زۆر ده‌هێلمه‌وه، ئه‌مشه‌ویش ڕه‌نگه
درگاكه نه‌یه‌وێت به‌ئاسانی وه‌ك شه‌وانی تر خۆیبات
به‌ده‌سته‌وه. . درگاكه ده‌كه‌مه‌وه و گڵۆپه‌كه
هه‌ڵناكه‌م، تاریكی ژووره‌كه‌م له‌تاریكی هیچ جێیه‌ك ناچێ،
بواری هه‌ناسه‌ی تیا نییه ..قه‌تیسم ده‌كات، ده‌مخنكێنێ ..
ده‌ست ده‌به‌م شووشه بچوكی شرووبی سه‌رمێزه‌كه‌م ئه‌دۆزمه‌وه
و هه‌ڵیئه‌قوڕێنم، تیژتیژ هه‌ناوم ئه‌بڕێت و ئه‌گاته
گه‌ده‌م. به‌رگه‌ی ئه‌م تاریكیه ناگرم، وه‌كو جاران نیم،
تاریكایی زڕنوقم ده‌با .
گڵۆپه‌كه‌م هه‌ڵكردووه و ده‌مه‌وێت خۆم بنووسمه‌وه، له‌قاڵه
قاڵی ده‌نگه‌كانی ناوخۆم به‌ئاگا دێمه‌وه ده‌نگێك پێمده‌ڵێ
به‌ئه‌مانه‌ته‌وه شته‌كان بگێڕه‌وه و له سه‌ره‌تاوه
ده‌ستپێبكه، ده‌نگێكی تر بینی لێهه‌ڵئه‌بڕێت و ئه‌ڵێ ئاخر
گێله‌پیاو خه‌ڵك چ ئیشیان به‌سه‌ره‌تای تۆ هه‌یه ؟... من
قه‌ده‌رێك مات و ڕاماوم، باشه سه‌ره‌تای من كامه‌یه؟ مێشكم
ئه‌گووشم یاده‌وه‌ریم له‌و به‌یانیه كۆنتری تیا نیه كه
ڕه‌شه‌بایه‌كی كورت به قه‌میسێكی ڕه‌ش و ته‌نوره‌یه‌كی
كورتی پڵنگییه‌وه هێنابووی و دانه‌ویه‌وه و وتی "كتێبێكم
ده‌وێت باسی زۆر
كۆن بكات.. زۆرزۆر.. باسی زه‌مانی به‌رد بكات"، من خه‌ریك
بوو ده‌موده‌ست بڵێم هه‌موو ئه‌وكتێبانه‌ی مێژووی چاپكردنیان
له‌پێش له‌دایكبوونی تۆوه‌یه بۆ ئه‌و مه‌به‌سته‌ی به‌ڕێزت
ده‌شێن، ئاخر جه‌نابتان به ته‌شریف هێنانتان زه‌مانێكتان
گۆڕی، به‌ڵام نه‌م وت.. من ده‌توانم ئه‌م یه‌كه‌م
به‌یانی‌بینینه بكه‌مه یه‌كه‌م ڕۆژی خۆمی مانگی خۆمی
ساڵی خۆم .
ده‌ته‌وێت وا ده‌ستپێبكه‌یت، دوودڵیت خه‌تێك به‌سه‌ر ئه‌و
دێرنه‌دا ده‌هێنیت، خه‌ته‌درێژه‌كان له‌و خه‌تانه ده‌چن كه
ده‌تهێنا به‌ژێر نووسینه گرنگ و جوانه‌كانی ناوكتێبه‌كاندا،
دواتر هه‌ر ئه‌و خه‌تانه‌م ده‌هێنا به‌سه‌ر ده‌خه‌تی وردوردی
له‌ته‌نیشت یه‌ك، كه ژماره‌ی سێكسه‌كانی كچێكی له خانه
تایبه‌ته‌كه‌ی خۆیدا ته‌واو ده‌كرد.
هه‌موویان خانه‌ی خۆیان هه‌بوو، من ده‌مگوت ده‌بێ به‌و
تایبه‌تمه‌ندیانه‌ی خۆتانه‌وه بژین كه‌چی هه‌میشه (شه‌وێن
خۆشی)
په‌نجه‌كانمی ئه‌لێسلیه‌وه و ده‌یگوت "توخوا ناوی من
بخه‌ره ناو خانه‌كه‌ی شه‌یما قه‌پاته‌وه"، من ده‌مگوت نابێ
تۆ كه ده‌ته‌وێ ناوت هه‌بێ، دروست ببی، كوڕان كه چوونه
حه‌مام تۆیان بیربكه‌وێته‌وه، تۆ ئه‌گه‌ر ئه‌ته‌وێ
مشته‌ریه‌كانی خۆت زیاد بكه‌ی ده‌بێت له‌خانه تایبه‌ته‌كه‌ی
خۆته‌وه ده‌ستپێبكه‌ی .
جارجار توشی وه‌همێكی سه‌یر ده‌بوو خۆیی لێ ئه‌گوڕا،
چه‌ندین جار به ورده ماچێ یان مه‌مك گوشینێ خه‌تێكی وردی
بۆ( شه‌یما قه‌پات) دائه‌نا وای ده‌زانی ئه‌وه یه‌كه‌مین
جاره ئه‌و كچه ببینێت، یان یه‌كه‌مین جاره به‌و كچه بگات
كه ساڵانێكه خه‌یاڵی ئه‌می داگیركردووه.. ڕائه‌مام،
خه‌یاڵ ئه‌یبردمه‌وه، چاوه‌كانی ئه‌یانبردم، خۆمم
ئه‌دی توند باوه‌شم كردووه به كه‌مه‌ری سمۆره‌یه‌كا ئه‌ویش
خۆی شل كردووه و به مه‌كره‌وه جارجار خۆی ڕائه‌پسكێنێ،
ڕوتوقوت هه‌ردووكمانین، من شه‌ڵاڵم له‌عاره‌ق، تووكه‌كانی
كلكی ئه‌و هه‌ربه‌پێوه، سیسه‌مێكی نووستنن، سڵ له
ده‌مولوتی ناكه‌مه‌وه، ڕیزێك ددانی ورد لێوێكی ته‌نك
شاردونیه‌ته‌وه، ده‌ست ده‌خه‌مه ناو په‌نجه
ورده‌كانییه‌وه، چنگونینۆكی نییه، ده‌ستم ئازاری ده‌گا،
توندتر ده‌ستم ئه‌گوشێ، زیاتر ئاره‌قم كردۆته‌وه.. من نازانم
ئه‌وه‌ی له باوه‌شمایه (ئه‌و)ه یان شه‌یما قه‌پات، ئێسته‌ش
نازانم من(ئه‌و)م
له‌وێ به‌جێهێشتوه و به‌دوای شه‌یمایا هاتووم یان شه‌یما
له‌وێیه و من به‌دوای (ئه‌و)دا لێره‌م ..؟ نازانم هه‌ندێ
له‌وانه‌ی پێش من ئه‌م چیرۆكه‌یان نووسیوه‌ته‌وه ده‌ڵێن
(ئه‌و)و شه‌یما هه‌ریه‌كێكن..وه‌لێ من وا ناڵێم.. ئاخر چی
بڵێم من خۆم ئه‌كته‌ری ئه‌م فیلمه‌م و دۆسته‌كه‌مم ون كردووه
.. كوا بینه‌رێكی رۆمانسی په‌نجه‌ی ناسكی بنێته سه‌ر
یه‌كێكیان و بڵیت هۆو پیاوی ون، ئه‌مه‌یان مه‌عشوقه
راسته‌قینه‌كه‌ته..! هه‌ست ده‌كه‌م ده‌ماره‌كانی لێده‌ده‌ن ..
گه‌رما ته‌قاندمی، وه‌خته له‌هۆش خۆم بچم، قریوه پڕ
له‌شه‌هوه‌ته‌كه‌ی ڕام ئه‌چڵه‌كێنێ، به دێڕێك كه پڕه له
(هـ)ی تینوو ده‌یوت "ده‌یهـ كواهـ خه‌هـ ته‌كه‌ته "شه‌یما
حسابی ڕۆژی وه‌رده‌گرت و تۆ خه‌تێكت ده‌هێنا به‌سه‌ر نۆ
خه‌تی نۆ پیاوی تر و ماچێكی خۆتا .
من
ئه‌م خه‌تخه‌تێنه ئه‌مكوژێ، هه‌وراز و نشێویه‌كانی دێرێك
شتێكم پێده‌ڵی، ئه‌گه‌ر
هیچیش بێت، به‌ڵام بیابانی خه‌تێكی ڕێك جگه له مه‌رگ
ومه‌رگ هیچی تر له‌م نیوه‌شه‌وه‌یا نادركێنێ، ئه‌م شه‌وه
دره‌نگه ساڵیادی ته‌له‌فونێكی ئه‌وه كه به چپه چه‌ند
پیتێكی پچڕپچڕی بۆ ناردم من دره‌نگێك تێگه‌یشتم كه ئه‌و
وتویه‌تی "من وتۆ پێكه‌وه په‌ڕه‌یه‌كی نوێ
هه‌ڵئه‌ده‌ینه‌وه " من سه‌فه‌ری تولانیم كرد.. چه‌ندین وڵاتم
دی.. چه‌ندین ئه‌رزی خوا گه‌ڕام.. كه‌شتی گه‌وره گه‌وره
.. فڕۆكی نوێ ..شه‌مه‌نه‌فه‌ر..درێژترین ڕه‌فه‌كانی
كتێبخانه.. كورتترین مه‌وداكانی په‌یوه‌ندی و ئیمه‌یڵ ..ئه‌و
(په‌ڕه نوێیه ) ش هه‌بوایه تۆ له‌كوێ بوی تاپێكه‌وه
هه‌ڵیبه‌ینه‌وه؟!.
هاوڕێیه‌كم كه له شكستی عه‌شقه‌وه ده‌ستیدابووه بازرگانی
شوشه و سه‌ركه‌وتنێكی گه‌وره‌ی به‌خۆیه‌وه بینیبوو، ئه‌و
كه ماڵه‌كه‌ی یه‌كپارچه فه‌خفوری و چینی و كه‌مۆڵه‌و مێزو
ته‌نانه‌ت كورسی شوشه بوو، له‌سه‌ر یه‌كێك له‌و قاپانه‌ی
وێنه‌ی خیامی تیایه، به جامێ شه‌رابه‌وه به‌ده‌ست و
خه‌تێكی باریك نووسیبووی "ژیان په‌رداخێكی شوشه‌یه
به‌ده‌ست منداڵێكی چه‌توونه‌وه " ئه‌و عه‌سرێكی دره‌نگ
به‌وپه‌ری له‌خۆبایبوونه‌وه، به‌ده‌م بسته خواردنه‌وه پێی
وتم "براده‌ر عه‌شق وه‌كو باری شوشه وایه، كه‌ده‌ستێكی كرد
ئیتر خێره‌كه‌ی كورت ده‌هێنێ، باری باش ئه‌وه‌یه خۆت
له‌خاوه‌نه‌كه‌ی بكریت" من توێكڵی بسته‌یه‌ك به‌و هه‌موو
ره‌قێتییه‌ی خۆیه‌وه پوكمی هه‌ڵدریبوو ئه‌ویش ده‌یوست
به‌لوغزه‌وه پێمبڵی عه‌شقی ژنێكی مێرددار
ناته‌ندروستییه‌كه‌ی له‌وه‌دایه له‌فه‌شه‌لیه‌وه تۆی
خۆشده‌وێت ..!
كه‌چی هه‌ر ئه‌و عه‌سره خوشكی ئه‌و بازرگانه وتی
"جه‌نابی میوان كاكم ڕاستناكات هیچ شتێك له‌عه‌شقی ژنێكی
مێرددار گه‌وره‌و پیرۆز تر نییه، تۆ بروانه ژنێك به‌سه‌ر
مرۆڤێكی ترا باز ده‌دات تۆی خۆشده‌وێت "من گێژبووم، به‌رچاوم
ڕه‌ش بوو، بسته و كچه‌كه تێكه‌ڵبوون .. خوشك و براكه‌م
به‌سه‌ر یه‌كتره‌وه ئه‌بینی . ڕشامه‌وه و ڕه‌شاوم
هه‌ڵئه‌هێنا، ره‌شاو به‌رپێمی ته‌ڕكرد، جۆگه‌له‌ی به‌ست
بۆخواره‌وه، من هێڵنجم ئه‌دا و ڕشانه‌وه دوایی نه‌ئه‌هات ..
ڕه‌شاو قوله‌پێمی ته‌ڕكرد، من چاوم ده‌رتۆقیبوو، ئه‌كۆكیم و
پر به ده‌مم ڕه‌شاو ئه‌هات ..ڕشانه‌وه‌یه‌ك نه‌بوو بیر
له‌ته‌وابوون بكاته‌وه، قوڵپی ڕشانه‌وه ره‌شه‌كه ئه‌و
خوشك و برایه‌ی به ڕووتی به‌یه‌كه‌وه ره‌شتر كرد .
هه‌موو یه‌كشه‌مانی هه‌فته‌یه‌ك له‌وسه‌ری بازاره‌كه‌وه
ده‌رده‌كه‌وت،
لوتێكی قنجی بچووك لێوێكی ته‌نك و چه‌ناگه‌یه‌كی شێوه
قۆقزی هه‌بوو، هه‌میشه سڵی له سێبه‌ره‌كه‌ی خۆی
ده‌كرده‌وه، گومانی له‌هه‌موو شتێك ده‌كرد، گومان ئه‌وی
ده‌برده‌وه سه‌ر بنه‌چه‌ی گیانه‌وه‌رێكی وردیله كه
پێیده‌ڵێن سمۆره .. ده‌مزانی بۆ كتێبه مێژوییه‌كان هاتووه،
بۆ ئه‌وانه‌ی زه‌مانی ئه‌شكانی، هیلینیستی، سه‌رده‌می
وه‌رك، ئاشوری، ده‌گه‌را.
ده‌تگوت ئه‌م كچه زۆر زوو شتێكی ون كردوه و ئێسته
ده‌یه‌وێت له‌رێگه‌ی ئه‌و كتێبانه‌وه ئه‌دره‌سێكی ئه‌و
شته‌ی ده‌ستكه‌وێت، هاوته‌مه‌نه‌كانی ئه‌و كتێبی هونه‌ری
چێشتلێنان، بورده‌ی جلوبه‌رگ، گۆرانی هونه‌رمه‌نده
گه‌نجه‌كان زیاتر هیچی دییان نه‌ده‌كڕی .
ئه‌م كتێبه‌كانی هه‌ڵده‌گرت و ماوه‌یه‌كی زۆر ده‌ستی
به‌سه‌ر به‌رگه‌كانیانا ده‌خشاند، نزیكی ده‌كردنه‌وه له
ده‌مولێوه ته‌نكه‌كه‌ی، من سه‌رم داده‌خست، ده‌مگوت با شه‌رم
له من نه‌كات و تێر ماچیانكات، كه‌چی ئه‌و شه‌وێكی دره‌نگی
پایز پێیوتم من به بۆنی ئه‌و كتێبانه سوكنای به‌رۆحما دێت،
ئه‌گه‌ر بۆنی ئه‌و كتێبه كۆن و زه‌ردانه هه‌ڵمژی ده‌سبه‌جێ
ده‌چیته‌وه ئه‌و سه‌رده‌مانه، خۆت ده‌بینی جووتێك سۆڵه‌ت
له‌پێیایه و قه‌یتانه درێژه‌كانی تا نزیك ئه‌ژنۆت له‌سه‌ر
گۆشته‌كه‌ت توند كردووه، پارچه‌یه‌ك پێسته‌ت له‌به‌ر دایه‌و
ده‌ستبه‌تاڵ به‌ناو ئه‌و حه‌شاماته قژئاڵۆسكا و مه‌نگه‌یا
دێیت و ده‌چیت .
ئه‌و منیشی فێری ئه‌و بۆنه كردبوو، به‌یانیان كه
كتێبه‌كانم ڕێكده‌خست، ده‌بوایه تێر تێر بۆنی كاغه‌زه
زه‌رده‌كان هه‌ڵمژم .. ئێواره‌یه‌ك هه‌موو كچه‌كانم
كۆكرده‌وه،
كۆرسێكم دادان، ویستم قه‌ناعه‌تیان پێبكه‌م كه لوت
به‌دبه‌خترین پارچه‌ی جه‌سته‌یه چونكه ماوه‌ی فریودانی
له‌هه‌ر ئه‌ندامێكی تر كه‌متره، لوتی پیاوێكی هه‌ستیار
ده‌توانێ زۆر زوو هه‌ست به
باكگراوندی بۆنی پێشووبكات، من له‌و قسانه‌دا وتم "ژن بۆن
به‌كارده‌هێنێت تا
هه‌ست به بۆگه‌نییه‌كه‌ی ناخی نه‌كه‌ین"، من زۆرم قسه
ده‌كرد، هه‌میشه وا بووم، ته‌واو پێچه‌وانه‌ی ئه‌و ده‌بوو
له هه‌موو بابه‌تێكا درێژدادڕی ته‌واوم بكردایه،
ئه‌وان كه گوێیان لێ گرتووم
له‌به‌ر ئه‌وه نا زۆَریان
خۆشه‌ده‌وێم و حه‌ز به قسه‌كانم ده‌كه‌ن
نـــــــــا. .ئه‌وان باش ده‌یانزانی هه‌ركه‌سێكیان نه‌یه‌وێت
گوێم لێبگرێ، ئه‌وه ده‌بوو به‌یانی ئه‌و ئیشه‌ی لای
كه‌سێكی تر بدۆزیبایه‌وه .
ئه‌وكچه به‌دبه‌ختانه نه‌ده‌كرا بۆن به‌كار نه‌هێنن، ئاخر
مشته‌رییه‌كانمان له‌ده‌ستده‌چوو، مشته‌ری چه‌ور هه‌میشه
گێله. له‌ده‌ره‌وه ده‌نگوباسی كچه‌كانی لای من له شاردا
ته‌قیبووه، ئه‌وان گرانترین بۆنی بیانیان له وڵاَته
عه‌ره‌بییه‌كانی باشوره‌وه پێده‌گه‌یشت.. هاوبه‌شیمان
له‌گه‌ڵ به‌ناوبانگترین كۆمپانیای بۆنی توركی هه‌بوو ..
ئه‌وان ده‌یانزانی بۆنی نه‌رم، بۆنی تیژ، بۆنی پر، بۆنی
قورس، بۆنی تورت و جۆََره‌ها
بۆنی سێكسی ترمان بۆ ڕه‌وانه بكه‌ن .
هه‌ڵبه‌ته منی كتێبفرۆش ده‌مزانی ڕه‌نگی به‌رگی كتێبه‌كان
چ كاریگه‌رییه‌كی جۆراوجۆریان له‌سه‌ر خۆێنه‌ره‌كان هه‌یه و
كامیان پرفرۆشترینیانه، به‌ڵام ئه‌م تێگه‌یشتنه‌م چڕتر
بووه دوای ساڵانێكی دوور و پاش سه‌فه‌ری به‌دی ئه‌و.
له‌راستیشدا ئیشه‌كه‌م وای ده‌خواست ئه‌و پسپۆرایه‌تییه
به‌ده‌ستبێنم.
من هه‌میشه قسه‌م هه‌بووه، هه‌ر شه‌وێك یه‌كێك له‌و كچانه‌م
لای خۆم گلدابێته‌وه، شه‌ری ئه‌وه‌م پێفرۆشتووه، ئه‌و
ستیانه سووره‌ی بگۆرێ كه ئه‌مرۆ پیاوه گه‌لۆره‌كانی ئه‌م
شاره‌ی پێفریوداوه، من به غرورێكی شاعیرانه‌وه ده‌مگوت
"كچێ سوور سه‌قه‌تترین و سه‌خیفترین ڕه‌نگی دونیایه، سوور
هه‌موو شتێك ده‌ڵێت، سوور جێیه‌ك ناهێڵێته‌وه بۆ لوغز، سوور
چاو دیلده‌كاو پیاو زوو ده‌وروژێنێ و زووش زایه‌ی ده‌كات،
سوور ناهێڵێت هه‌قی ته‌واوه‌تی بده‌ین به‌یه‌ك، ده كه‌ره
ئه‌و لیباسه سوره داكه‌نه "خه‌ریكم شته تایبه‌ته‌كانی خۆم
ده‌ڵێم، ئاخر من هه‌میشه لێره‌ی نووسین ده‌ترسم !.. تائێستاش
به‌گومانم له‌وه‌ی بنووسم .
كه پێڵوه‌كانت دائه‌خه‌یت ته‌زویه‌كی تیژپه‌ر به سه‌رتدا
دێت، گێژده‌بیت، به‌رچاوت لێڵ ده‌بێ و ناته‌وێت چاو دابخه‌ی،
ئاخر به‌رده‌وام نووستن زیاتر له بێداریی ئازاری ڕوَحی
تۆی داوه.. گوناهی منیش نییه، ئاخر
خۆشم (ده‌ویست) یان (ده‌وێت)، نازانم ئه‌م دووانه كامیان
بنووسم. ئه‌وكاته‌ی من وێنه‌ی ئه‌وم له‌ویا هه‌ڵگرت
هه‌رزه‌یه‌كی بێئه‌زموون بووم له‌ژیان، من چوزانم پێڵو ته‌نها
یه‌كجار وێنه‌ی تیا هه‌ڵئه‌گیرێت، تۆ بێخه‌به‌ربووی له‌وه‌ی ڕۆژێك
دێت له‌م
وڵاته سارد و دوورانه به‌دوای وێنه‌ی حه‌قیقی ئه‌ودا
ده‌گه‌رێیت و ئه‌و جگه له چاپی دیوی ناوه‌وه‌ی
سه‌رپێڵوه‌كانی خۆت له گشت شوێنێك ونه ..!
ده‌ماره‌كانم خاوبوونه‌ته‌وه، جه‌سته‌م ئه‌كشێ، پێستم خۆشتر
دێت به‌ده‌سته‌وه، ڕه‌نگه شرووبه‌كه كاریگه‌ری خۆی بووبێ،
باشتر، به‌ڵكو بتوانم ئارامتر بنووسم، دوور له‌قینی ئه‌و
ڕۆژانه‌ی ئازارم تیا چه‌شتووه .
به‌دیار كتێبه‌كانه‌وه خه‌یاڵ بردووتیه‌وه، دڵت په‌له‌تر
لێئه‌دا، خه‌یاڵت ئه‌پچرێ، ئه‌زانی ئه‌و كچه له‌و
نزیكانه‌یه ئه‌گینا تۆ له‌ژیانی خۆتا ئارامترین پیاو بوویت،
ئه‌و كه نزیك ببووایه‌وه من قسه‌م به ئاسانی بۆ نه‌ده‌كرا،
چه‌ند پیتێكم ئه‌نووساند به‌یه‌كه‌وه، هه‌ندێك پیتی ترم
ئه‌په‌ران، ده‌ستم ئه‌له‌رزی، هه‌ستم به سووكی كێشی خۆم
ده‌كرد، ده‌مزانی تازه زه‌وی ناتوانێ من كێشبكات، هه‌موو
شتێكم بیر ده‌چووه و دڵم خێراتر لێی ئه‌دا.
بڕیارێكی شێتانه نیه ئه‌گه‌ر بڵێم به‌نیازی گه‌رانه‌وه‌م،
من له‌م وڵاته ساردانه هیچ هه‌ڵناهێنجم، ئه‌گه‌رێمه‌وه و
ڕه‌نگه ده‌ست بكه‌مه‌وه به كتێبفرۆشتن، خاڵی كۆتایی بۆ
ئه‌م گێلێتییه‌ی خۆم دائه‌نێم.. چیتر ڕاناكه‌م به دوای
ده‌نگێكا كه زۆرتر به سه‌راب ده‌چێت.. من ئه‌گه‌رێمه‌وه بۆ
وڵات وه‌لی دڵنیام ئه‌م خه‌یاڵه شێته لێم ناگه‌رێ و ڕۆژێك
هه‌رده‌مهێنێته‌وه ئه‌م غوربه‌ته.
كۆتایی2004
|