|
که‌ریم کاکه
وا ده‌بینم زمانی ده‌سه‌ڵاتی سیاسیمان له باری زۆر ده‌گمه‌ن نه‌بێ، له
رووی دنیای ده‌ره‌وه‌ی خۆی زمانێکی ته‌واو بێ ده‌سه‌ڵاته، ده‌یه‌وێ وا
نیشاندات که پێڕه‌و له زمانی نه‌رمی سه‌رده‌میانه ده‌کات، به‌ڵام ئه‌و
شێوه نه‌رمییه ناکرێ له چوارچێوه‌ی نه‌رمیی سه‌رده‌میانه بخوێندرێته‌وه..
زمانێکه نه هی گفتوگۆیه، نه هی یاسا ، نه هی هێز، زمانی قوربانییه‌کی
مێژووییه، زمانی زیندانیه‌کی هه‌تاهه‌تایی مێژووییه، ته‌نها له ریتمی
نووزانه‌وه‌و پاڕانه‌وه لێده‌داو جاروبار ده‌نگده‌داته‌وه.. ئه‌و جۆره
زمانه‌ش له‌م سه‌رده‌مه که سه‌رده‌می هێزو به‌رژه‌وه‌ندییه، سه‌رده‌مێکه
ویژدانی مرۆیی به ئاسته‌م ئه‌گه‌ر نووزه‌یه‌کی لێوه بێ، به هیچ ره‌نگێ
کاریگه‌ریی به سه‌ر به‌رانبه‌ره‌وه جێناهێلێ، زمانێکی وازیندانی که‌م و
زۆر له‌گه‌ڵ سیاسه‌تی سه‌رده‌م نایه‌ته‌وه‌و ته‌واو ناته‌بایه.
هه‌ر ئه‌و ده‌سه‌ڵاته سیاسیه به رووی ناوه‌خۆدا رێک رۆژهه‌ڵاتی ناوه‌راستیانه‌یه،
زمانێکه تا ئه‌ودیوی توندی تونده، هێڕشبه‌ره، بواری ده‌مکردنه‌وه بۆ ئه‌ویدی
ناهێڵێته‌وه، زمانێکه دیوه‌خانیانه، هه‌ر ده‌ڵێی له بڵندگۆی مزگه‌وته‌وه‌یه،
هی باوکێکی غه‌داره به‌سه‌ر کوڕو کچه‌کانیه‌وه، زمانێکه له هێزی ده‌ره‌وه‌ی
زمانه‌وه ریتمی رسته وه‌رده‌گرێ.. ئه‌م زمانه‌ی ده‌سه‌ڵات پێچه‌وانه‌ی
زمانه‌که‌ی تریه‌تی، هه‌ردوو زمانه‌که‌ی ده‌سه‌ڵات- به ئاراسته‌ی ده‌ره‌وه‌و
به ئاراسته‌ی ناوه‌وه- هیچیان زمانی گفتوگۆ نین، هیچیان هێزی زمانی سه‌رده‌میانه‌یان
تێدا نیه، هیچیان هی ئه‌وه نین ئومێدی گرتنی ئه‌و (به‌ر) ه‌یان لێ چاوه‌ڕوان
بکرێ که ده‌سه‌ڵات به به‌رده‌وامی وه‌ک مژده‌نامه‌یه‌ک به خه‌لکی راده‌گه‌یه‌نێ.
زمانی رۆشنبیرییشمان به شێوه‌یه‌ک له شێوه‌کان له هی ده‌سه‌ڵات ده‌کات،
مه‌به‌ست ئه‌و رۆشنبیرانه‌یه له ده‌ره‌وه‌ی ده‌سه‌ڵات گه‌مه‌ی رۆشنبیری
ده‌که‌ن یان ده‌یانه‌وێ گه‌مه‌یه‌کی وا بکه‌ن، ئه‌ویش خاوه‌ن ئه‌و زمانه
نیه که بتوانێ رۆشنبیریانه له رۆشنبیریی دنیادا قسه‌ی خۆی هه‌بێت و به
ناسنامه‌یه‌کی رۆشنبیرییه‌وه تێکه‌ڵی دنیا بێت... وه‌ک ده‌سه‌ڵاته سیاسیه‌که
بێ ده‌سه‌ڵاته... ئه‌وه له‌ولاوه له‌ملاوه‌ش له ئاست ده‌سه‌ڵاتی سیاسی،
به‌شی زۆری رۆشنبیران نه‌یانتوانیوه به زمانی ره‌خنه بێنه‌ده‌نگ و چیه‌تی
ده‌سه‌ڵات شڕۆڤه بکه‌ن، په‌نایان بۆ هه‌مان زمان بردووه که ده‌سه‌ڵات
پێی ده‌ئاخفێ، نه‌یانتوانیوه له ده‌ره‌وه‌ی ئه‌و زمانه‌وه زمانی
رۆشنبیرییانه بێننه ئاراوه، ئه‌وانه وه‌ک ده‌سه‌ڵاتی سیاسی پێڕه‌و له
زمانی هه‌ڕه‌شه ده‌که‌ن، زمانی هه‌ندێ له‌وانه جنێوئامێزتره له هی
کادرێکی سیاسیی له سه‌رده‌م به جێماوو له حزبیه‌کان حزباویتر درووشمبازی
ده‌که‌ن... هه‌ڵبه‌ته ئه‌و زمانه له ده‌ره‌وه‌ی کرده‌ی رۆشنبیری سه‌رچاوه‌ی
گرتووه، ئه‌و زمانه کاردانه‌وه‌یه، کاردانه‌وه‌ی کاری ده‌سه‌ڵات به
دیوه نێگه‌تیفیه‌که‌ی، زمانێکه ده‌یه‌وێ تۆڵه‌ی سیاسیانه له ده‌سه‌ڵات
بکاته‌وه‌و ریسوای بکات، به‌ڵام به پێچه‌وانه‌وه ده‌سه‌ڵات به‌مه تونترو
به‌هێزتر ده‌بێ و بیانووی زیاتری پێده‌به‌خشێ بۆ نه‌خوێندنه‌وه‌ی رۆشنبیر.
پێموایه رۆشنبیری کورد پێویسته به به‌رده‌وامی ده‌سه‌ڵاتی سیاسیی کوردی
ره‌خنه‌رێژ بکات و گوێنه‌داته ئه‌و بیانووانه‌ی که ده‌سه‌ڵات ده‌یانهێنێته‌وه
بۆ ره‌خنه نه‌گرتن له خۆی... به‌ڵام نابێ رۆشنبیر داخ له دڵانه، به مه‌به‌ستی
تۆڵه سه‌ندنه‌وه‌و ریسواکردنی نارۆشنبیریانه له باره‌ی ده‌سه‌ڵاته‌وه
بدوێ و بنووسێ، چونکه ئه‌گه‌ر وایکرد، له‌مه‌وه زیانی هه‌ره گه‌وره به‌ر
کرده‌ی نووسین ده‌که‌وێ و جیاوازییه‌ک ناهێڵێته‌وه له نێوان زمانی سیاسه‌ت
و زمانی رۆشنبیری، ئه‌و دوو زمانه‌ش ته‌نها له‌سه‌ر گۆڕی یه‌کدی به یه‌کدی
ده‌گه‌ن.
|